TL-EUA Organiza Semináriu Kona-ba Autoridade Marítima

0
40

DÍLI, (ANTIL) -Timor-Leste (TL) liuhusi Gabinete Primeiru-Ministru (GPM) hamutuk ho Estadu Unidos Amerika (EUA) hala’o semináriu kona-ba Autoridade Nasional Marítima ho objetivu atu apoia sustentabilidade no efetivu nasionál autoridade marítima iha Timor-Leste.

Tuir komunikadu ne’ebé ANTIL hetan, semináriu ne’e rasik sei hala’o durante loron tolu, 22 to’o 24 Fevereiru iha Kuartel Jerál Falintil-Forsa Defeza Timor-Leste (F-FDTL), Ministériu Defeza.

GPM apresia ho esforsu ne’ebé embaixada EUA halo, tamba liuhusi semináriu ida ne’e bele hariiku liu tan koñesimentu no matenek hodi kontribui ba diskusaun hodi estabelese Autoridade Nasionál Marítima Timor-Leste nian.

Autoridade ida ne’ebé TL tetu dadaun ne’e aprova konseitu estratéjia Timor-Leste nian ba Defeza no Seguransa. Timor-Leste ho Estadus Unidos Amérika fahe interese mútua hodi kontinua paz, prosperidade no seguransa iha rejiaun Ázia Pasífika.

Nasaun rua ne’e rekoñese katak organizasaun marítima ho misaun ne’ebé klaru no responsabilidade hodi prepara didi’ak atu proteje interese koletiva kona-ba tasi husi ameasa krime transnasionál, tráfiku (sasan no ema) no peska ilegál ne’ebé fó ameasa ba seguransa no prosperiedade Timor-Leste nian iha rejiaun.

Fasilitadór sira ba semináriu loron tolu ne’e mak Komandante Pasifíka iha Hawai. Fasilitadór sira ne’e sei fahe esperiénsia kona-ba lei tasi nian, implementasaun lei marítima, seguransa marítima, governasaun marítima, peskas no tópiku seluk tan.

Abertura semináriu ne’e sei halao diretamente husi Primeiru-Ministru, Rui Maria de Araújo no Embaixadora EUA iha Timor-Leste, Karen Estanton.

(Jornalista:Rafy Belo/Editor : Alberto Alves)

HUSIK IDA HATÁN