Timoroan 18.975 Rejistadu Tuir Formasaun Profisionál

0
30

DÍLI, (ANTIL)—Hahú husi tomada de posse to’o ohin loron, iha lideransa primeiru-ministru, Rui Maria de Araújo, governu liuhusi Sekretáriu Estadu Formasaun Profisionál (SEPFOPE) no parseiru dezenvolvimentu sira rejista ona timoroan na’in 18.975, kompostu husi mane na’in 9.869 no feto na’in 8.106 ne’ebé buka oportunidade atu partisipa iha formasaun profisionál no empregu nian.

Informasaun ne’e hato’o husi Primeiru-ministru, Rui Maria de Araújo, iha Palácio do Governo, foin lalais ne’e ba profisionál komunikasaun sosiál sira.

Primeiru-ministru mós informa katak alende formasaun profisionál, governu mós haruka ona traballadór na’in 921 ba Korea do Sul hodi serbisu iha área peska nian,  ne’e kompostu husi traballadór na’in 610 (mane na’in 570, feto na’in 40).

Nune’e mós ba fábrika sira, traballadór na’in 311 (mane na’in 284, feto 27) no tau naran on aba estudante na’in 4.154 (mane na’in 1400, feto na’in 2.754) hodi tuir formasaun iha dalen Korea nian.

Governu mós haruka ona traballadór na’in 459 (mane na’in 339, feto na’in 120) ba Austrália hodi serbisu. Iha área otelária no turizmu traballadór na’in 73 (mane na’in 45, feto na’in 28) nomós ba área hortikultura traballadór na’in 384 (mane na’in 294, feto na’in 92).

Rui Maria de Araújo informa mós katak alein de haruka traballadór timoroan ba rai li’ur, governu mós kria programa auto-empregu no aprova ona proposta 196 atu harii negósiu ki’ik iha komunidade sira, ne’ebé koresponde ho benefisiáriu na’in 1.794 ne’ebé kompostu husi mane na’in 190 no feto na’in 604.

Nune’e mós, proposta sira husi graduadu na’in 18 ho benefisiáriu na’in 151 (mane na’in 111, feto na’in 40) no proposta husi klibur difisiente lima ho benefisiáriu na’in 44 (mane na’in 29, feto na’in 15).

Jornalista: Rafy Belo/Editor : ALbertob Alves)

 

HUSIK IDA HATÁN