SEPFOPE Entrega Ekipamentus Ba Grupu Benefisiáriu Auto Empregu

0
50

TIBAR (ANTIL) – Sekretaria Estadu Polítika Formasaun Profesional no Empregu (SEPFOPE) liu-husi Diresaun Nasional Polítika Empregu, Departamentu Auto Empregu hala’o serimónia entrega ekipamentus ba grupu benefisiáriu auto empregu hamutuk 91 grupu ne’ebé simbolika husi grupu nain 14 inklui grupu graduadu no efisiénsia.

Diretor Sentru Formasaun Tibar, Simão Tito Barreto dehan pasu ida tan servisu hamutuk SEPFOPE trasa ba iha tinan kotuk no mós tinan ida nia laran halo distribuisaun ekipamentus ne’ebé bele suporta atividade grupu benefisiáriu auto empregu.

“Grupu benefisiáriu sira tenke kuidadu ho ekipamentus ne’ebé ho kondisaun foun, dalaruma ema hanoin mákina foun ne’e sira uza nia diak hela deit, mákina sira bele foun maibé tenke uza ho kuidadu”, tenik Simão Tito iha nia intervensaun iha Sentru Nasional Empregu no Formasaun Profisional, kuarta (22/02).

Iha fatin hanesan, Diretor Geral Pilítika Empregu, Paul Alves informa Husi 91 grupu ne’e, SEPFOPE halo entrega ba grupu nain 14 ne’ebé reprezenta no total benifisiáriu ne’e ema nain 917 ho orsamentu ne’ebé aloka hamutuk US$ 220,000.

“Grupu sira ne’ebé mak orsida simu, ita halo simbolikamente deit ba grupu nain 14 no restu ekipa tékniku sei entrega ba 91 grupu”, tenik DG Paul Alves.

Nune’e nia dehan tan, labele fó hotu apóiu ba grupu sira hotu tamba proposta ne’ebé mak tama iha SEPFOPE kuase 1000 resin no ekipa tékniku tuir lei tenke halo avaliasaun ba fatin  katak grupu sira hala’o duni atividade tamba durante avaliasian iha tinan hirak liu ba, grupu barak mak la hala’o atividade.

DG informa, objektivu husi programa auto empregu atu hakbiit grupu benefisiáriu sira halo negésiu, kria servisu no kria kapu trabalhu ba ema seluk.

Nia realsa, programa auto empregu ne’e dekonsentra iha munisípiu atu nune’e ema labele mai hotu iha Díli.

Ekipamentus hirak ne’e, atu suporta atividade hanesan alfaiate, karpintaria, ofisina, rental komputador, hakiak fahi, dulas hare, kuda modo, servis eletroniku, fugaun lokal, manu lokal, restaurante, produs kripik, produs sabaun, produs mina nuu, hakiak ikan, tunu paun, motif tais timor no produs sinelus. (Jornalista: Julia Chatarina/Editor: Alberto Alves)

HUSIK IDA HATÁN