SEJD : Susesu Iha Futebol TL Presiza Konsensu

0
61
Leovigildo Hornay

BAUCAU (ANTIL)—Sekretáriu Estadu Juventude no Desportu, Leovigildo Hornai hateten futeból iha Timor atu la´o di´ak, Prezidenti Federasaun Futeból Timor-Leste (FFTL), Francisco Kalbuadi Lay no Prezidenti Liga Futeból Amadora (LFA), Nilton Exposto Gusmão tenki túr hamutuk hodi fó liman ba malu para haburas futeból.

“Ita-Boot na´in rua labele halai sees hosi problema ida. Governu tenta atu fasilita prosesu ida ne´e. Só ida ne´e maka ita bele fó korajen ba klubu sira atu bele investe didi´ak iha área futeból,” Leovigildo hato´o kestaun ne´e liuhusi nia deskursu iha abertura Liga Fuuteból Amadora époka daruak iha Estádiu Munisipál Baucau, Sábadu (18/2).

Nia haktuir, foin lalais liu-ba, nia hasoru malu informalmente ho Prezidenti FFTL, Francisco Kalbuadi Lay iha Dili hodi ko´alia kona-ba oinsá bele halo koordenasaun no komunikasaun di´ak ho parte sira ne´ebé hadomi futeból atu ko´alia futuru futeból iha Timor.

Leovigildo hatutan, iha tempu badak nia laran nia sei inkontru ofisiál ho estrutura FFTL atu bele rezolve problema balun ne´ebé durante ne´e sai konsumu públiku maka hanesan problema AFC/FIFA fó sansaun ba Timor relasiona ho kazu falsifikasaun dokumentu jogadór brazileiru sira sai sidadaun Timor iha tinan hirak liu-ba no kongresu FFTL ne´ebé seidauk hala´o. (Jornalista: Xisto Freitas/Editor : Alberto Alves)

HUSIK IDA HATÁN