Presu Tikete LFA Másimu $5,00

0
44

DILI, (ANTIL) – Diretór Divizaun Vendas Liga Futeból Amadora (LFA), Joaquim Vides hateten presu tikete ba jogu primeira divizaun LFA iha Estádiu Baucau no Maliana diferente ho presu tikete iha jogu époka primeiru iha Estádiu Munisipál Dili.

Nia informa, tribun ba VIP (Very Person Important/bainaka importante) ne’e ho presu $5,00 kada ema no hosi tribun liman loos no karuk ne’e ho presu $1,00 kada ema.

Iha jogu époka primeiru iha Estádiu Dili, tribun ba VIP ho presu $10, ba tribun semi VIP $3,00 no ida baibain ne’e $1,00. Entretantu, tribun parte leste nian ne´e ho presu $0,50 centavus kada ema.

“Razaun ita redus presu tikete iha Estádiu Baucau ne’e tanba haree ba kestaun ekonomia. Ita konsiente katak bainhira presu tikete ne’e ás liu, dalaruma komunidade kiik sira labele hola tanba osan mihis. Tanba ne’e, ita hatún nia presu nune’e ema hotu bele asesu hodi harame jogu ne’e,” Vides informa ba ANTIL via telefónema iha nia kna’ar fatin, Dili, Kuarta.

Nia dehan, produsaun tikete sei oituan hela no sei produs barak liu-tan bainhira haree nível partisipasaun iha jogu abertura ne’e oinsá. Nia hatutan, LFA lakohi produs barak antes du jogu tanba tauk risku. Katak, kuandu produs barak maibé volume partisipasaun jogu ne’e mínimu, LFA maka sei hetan prejuizu (kerugian).

Vides esplika, benefisiáriu ba  tikete nee kontinua hosi parte rua maka hanesan LFA pursentu 20 no klubu pursentu 80 (pursentu 40 ba klubu A no pursentu 40 ba klubu B).

Nia afirma, proibi klubu sira hetan pursentu 100 hosi presu tikete tanba relasiona ho estádiu ne´ebé klubu sira utiliza dadauk ne’e governu nian.

“Antes ne’e, klubu barak husu atu tikete ne’e sira maka fa’an rasik maibé ita haree fali ba fasilidade ne’e governu nian, entaun, LFA maka produs tikete para bele sustenta liga ne’e la’o. Aban bainrua klubu sira iha estádiu rasik ona, ne’e sira iha direitu tomak atu regula tikete,” Vides esklarese.   (jornalista: Xisto Freitas; editora: Rita Almeida)

HUSIK IDA HATÁN