PNTL Husu PN Aprova Lei Armas Brancas Molok Kampanha Eleitoral

0
101

DILI (ANTIL)–Atu asegura seguransa iha periodu kampaña eleitoral, komisariu Polísia Nasionál Timor Leste (PNTL) Faustino da Costa husu ba Parlamentu Nasionál atu aprova Lei Armas Brancas molok kampaña eleitoral.

“Ami sempre husu nafatin bainhira halo enkontru ho Primeiru Ministru ho Ministru Interior karik lei ida ne’ebé konsellu Minsitru aprova, PN aprova molok kampaña di’ak liu tan,” Segundu Komandante Jerál Faustino da Costa informa ba Jornalista sira iha Kuartel Jerál PNTL, Tersa (31/01).

Nia dehan bainhira lei ne’e aprova ona PNTL sei garante katak, la iha tan ona movimentu artes marsiais no utilizasaun rama ambon iha teritoriu laran tomak.

Faustino esplika katak iha lei ne’e ema ne’ebé mak lori de’it rama ambon sei kondena nia prizaun tinan tolu, nune’e mós ba sira ne’ebé mak rai ka uza atributu artes marsiais mós sei hetan prizaun tinan tolu.

“Hatais de’it roupa naran arte marsiais sira ne’e kastigu três anos,” Faustino realsa.

Hodi dehan, bainhira lei ne’e aprova ona husu atu kompri tanba bainhira viola sei hetan pena prisaun.

Molok ne’e Deputadu Parlamentu Nasionál sira liuhosi plenaria bolu atensaun ba komandu Polísia Nasionál Timor-Leste (PNTL) hodi kontrola movimentu Artes Marsiais, tanba arte marsiais hahú halo cek point ba malu.

Deputadu Cesar Pilotu dehan, situasaun cek point entre artes marsiais sira la bele husik nune’e de’it, tamba selae bele hamosu instabilidade iha eleisaun ne’ebé mak sei halao.(Jornalista : Manuel Pinto/Editor : Alberto Alves)

HUSIK IDA HATÁN