PN Aprova Jeneralidade Lei Armas Brankas

0
199

DILI, (ANTIL) – Parlamentu Nasionál (PN) Kurata, (22/2) aprova jeneralidade lei armas brankas ho votu a favór 47, kontra 0 no abstein 1 hodi kontinua halo diskusaun iha espesialidade.

Ministru Interior, Longuinhos Monteiro iha nia intervensaun hatete, governu fó apresiasaun ba esforsu ne’ebé deputadu sira halo, liu-liu komisaun A hodi hamosu textu subtitutivu.

“Governu konkorda ho textu ne’e, maibé husu konsidera nafatin proposta governu nian iha espesialidade,” Longuinhos Monteiro husu liuhosi nia intervensaun iha plenária molok halo aprovasaun ba textu subtitutivu.

Tuir Longuinhos, lei arma brankas governu aprejenta ho karater espesiál ho hanoin, bainhira hetan aprovasaun bele fasilita liutan ezekutór lei, liu-liu polísia sira bele hala’o servisu ho di’ak.

Preokupasaun governu nian, tuir Longuinhos mak iha textu subtitutivu ne’ebé mak komisaun A aprejenta seidauk akomoda kona-ba aktu rituais ne’ebé iha proposta orijinál governu mensiona ho nune’e nia husu atu halo diskusaun kle’an iha espesialidade, bainhira hetan aprovasaun.

Prezidenti Komisaun A, deputada Carmelita Caetano Moniz hatete, proposta lei hosi governu la-regula kona-ba armas brankas de’it, maibé husu atu regula mós pratika ilijitu artemarsiais ne’ebé regula antes ona iha lei númeru 10/2008 lei kona-ba artemarsiais.

Tuir nia, poposta governu laiha buat ida foun, foun mak kriminaliza utilizasaun rama ambon, maibé iha kontekstu ida ne’e bainhira haree ba implementasaun mosu lei lima mak presiza tau atensaun bainhira mosu pratika elijitu artemarsiais. Ho ida ne’e, PN liuhosi komisaun A harmoniza hodi tau hanoin iha textu subtitutivu nune’e bainhira hetan aprovasaun lei armas brankas ne’e sai lei ida ho karater espesialis atu autór lei sira uza ba pratika elizitu artemarsiais nian.

Erru seluk ne’ebé komisaun A detekta hosi proposta governu nian mak, la-konsege halo diferénsia ba armans brankas ne’ebé ema uza ba atividade ekonomia ho krime. Ho nune’e mak iha textu subtitutivu, PN halo esplikasaun kona-ba definisaun armas brankas loloos nian ne’ebé preve iha artigu 13 textu subtitutivu.

“Se asesór lei konsellu ministru servisu didi’ak karik, komisaun A mós la-ulun moras atu halo fali textu subtitutivu,” Carmelita kestiona.

Hodi detekta tan, lei arte marsiais no 10/2008 ne’ebé mak governu halo ona antes ne’e kopia loloos de’it lei artemarsiais hosi Portugal iha tinan 1972 nian.

Biar nune’e, Carmelita mós autoriza no sente laiha problema atu halo diskusaun kle’an ba textu subtitutivu hodi haree no halo di’ak buat balun iha diskusaun espesialidade. (jornalista: Manuel Pinto; editora: Rita Almeida)

HUSIK IDA HATÁN