PM Vizita STAE Hodi Identifika Problema Tékniku

0
29

DILI, (ANTIL) – Primeiru Ministru, Rui Maria de Araújo, Kuarta, (15/2) halo vizita supresa ba Sekretaria Tékniku Administrasaun Eleitorál (STAE) iha Kaikoli Dili, hodi haree besik preparasaun no problema tékniku ne’ebé orgaun eleitorál ne’e hasoru.

“Em jerál, preparasaun la’o ho di’ak”, Xefi Governu ba jornalista sira depois halo vizita ba STAE. Hodi hatutan, responsabilidade governu mak oinsá garante orgaun administrasaun eleitorál, liliu parte tékniku atu kria kondisoens hodi organiza teknikamente eleisaun prezidensiál no parlamentár.

Nia mos dehan, alterasaun lei eleitorál ne’ebé Parlamentu Nasionál (PN) aprova, agora hein de’it promulgasaun hosi Prezidenti Repúblika.

Xefi Governu husu ba STAE ho apoiu hosi Ministériu Administrasaun Estatál hatudu profisionalismu no servisu ho atensaun. Afirma, governu iha responsabilidade atu garante susesu iha eleisaun ho kestaun logistiku no tékniku, governu sei halo possivel atu alkansa susesu iha eleisaun.

Vizita ne’e akompaña hosi Ministru Estadu, Koordenador Asuntus Administrasaun Estadu no Justisa no Ministru Administrasaun Estatal (MAE) Dionísio Babo no Diretór Jerál STAE, Acilino Manuel Branco.

Jornalista: Julia Chatarina

Editora: Rita Almeida

HUSIK IDA HATÁN