PM Rui Husu Orgaun Eleitorál Hatudu Imparsialidade

0
20

DILI, (ANTIL) – Primeiru Ministru (PM), Rui Maria de Araújo husu ba Sekretaria Tékniku Administrasaun Eleitorál (STAE) atu  hatudu servisu ne’ebé profisionál no imparsiál iha prosesu eleisaun prezidensiál ba periódu 2017 to’o 2022.

Primeiru Ministru (PM), Rui Maria de Araujo. Foto : Egas Cristoão
Primeiru Ministru (PM), Rui Maria de Araujo. Foto : Egas Cristovão

“Ha’u husu ba funsionariu STAE hotu, hahú hosi diretór jerál ho nia funsionariu sira, diretór munisipál sira, brigadista hotu no ofisiál eleitorál sira atu garante servisu, tuir regra ne’ebé estabelese iha ámbitu eleisaun”, Xefi Governu hatete iha salaun STAE bainhira hasoru malu ho funsionariu orgaun eleitorál, Kaikoli, Kinta (15/2).

PM Rui apela ba servisu nain STAE nian atu hatudu tarefa ne’ebé profisionál no imparsiál iha periódu eleisaun tanba, hotu-hotu hatene katak tinan lima ona povu sempre ezerse direitu soberanu liuhosi eleisaun sira.

Tuir nia, STAE tenke servisu ho imparsiálidade atu labele halis tun sa’e tanba nu’udar servidór Estadu ne’ebé servisu iha orgaun administrasaun eleitorál presiza hatudu servisu ho koidadu no atensaun liuhosi regra servisu nian.

Governu liuhosi ministériu administrasaun estatál nia responsabilidade hodi garante servisu tékniku administrasaun eleitorál liuhosi meiu no kondisaun sira atu organiza teknikamente eleisaun prezidensiál ne’ebé sei monu iha 20 Marsu. (jornalista: Zezito Silva; editora: Rita Almeida)

HUSIK IDA HATÁN