PDIM ajudika ona projetu liu 70

0
47

DILI, (ANTIL)- Durante governasaun tinan rua konsegue dezenvolve setór infraestrutura iha ámbitu Programa Dezenvolvimentu Integradu Munisipál (PDIM) ajudika ona projetu liu 70 iha área eskola, merkadu, sentru saúde, rezidénsia ba médiku sira, bee hemu, kapela no irrigasaun.

Tuir komunkadu, VI Governu ne’e, remata ona projetu 67 PDIM nian no análiza ona inspesaun ba projetu ne’ebé la’o hela hamutuk 458. Iha ámbitu reabilitasaun patrimóniu komunitáriu Governu inspesiona ona projetu reabilitasaun eskola no instalasaun saúde no remata ona projetu setór edukasaun nian hamutuk liu 740 iha munisípiu 12.

“Ita implementa ona projetu espesiál hamutuk 39 liuhusi kontrolu diretu ADN (Ajénsia Dezenvolvimentu Nasionál-read) nian”, refere komunikadu husi Governu ne’ebé ANTIL asesu foin lalais ne’e.

Governu mós avalia ona projetu sira kona-ba edifikasaun, ponte, estrada, irrigasaun, protesaun ba cheias, eletrisidade. Proposta projetu emerjénsia husi 2013 hamutuk 117, proposta foun husi 2015 hamutuk 85, proposta foun PDIM husi 2016 hamutuk 94 no hala’o ona inspesaun 458.

“Ita avalia ona proposta 402 kona-ba projetu infraestrutura nian sira ho valór totál besik $ 797 M liuhusi Ajénsia Dezenvolvimentu Nasionál. Bainhira hala’o verifikasaun, kustu totál proposta hirak ne’e tun to’o $ 676 M, ida ne’e hanesan poupansa ida ba Estadu maka hamutuk liu $ 116 M”.

Aleinde ne’e, Governu inspesiona no aprova ona pagamentu relasiona ho projetu liu 2.683 iha munisípiu 12 no iha Rejiaun Espesiál Oekusi Ambeno. Projetu hirak ne’e englobe estrada no ponte, edifísiu, irrigasaun, portu, aeroportu no protesaun hasoru cheias.

“Ita harii ona abitasaun hirak prefábrika hamutuk 130 iha 2015 iha munisípiu Vikeke, Likisá no Dili, hanesan parte ida husi kompromisu Governu nian relasiona ho inisiativa hirak dezenvolvimentu ODM (Objetivu Dezenvolvimentu Miléniu-read) nian iha suku”, refere komunikadu ne’e. (Jornalista : Maria Auxiliadora/Editor : Alberto Alves)

HUSIK IDA HATÁN