MKIA Rekoñese Erru Ortográfiku no Gramatikál iha Buletin Promosionál

0
38

 DILI, (ANTIL) – Ministériu Komérsiu Indústria no Ambiente (MKIA) rekoñese erru ortográfiku no gramatikál iha boletin promosionál ba produtu timoroan ne’ebé prodús ho kuantidade 2000. Buletin ne’ebé produs ho montante osan $20.000 ho intensaun atu divulga, promove no haluan komérsiu iha Timor-Leste.

Diretór Nasionál Promosaun no Marketing, MKIA, Anibal Martins ba ANTIL, Tersa (21/2) iha Bebora-Dili informa, produsaun brosura ne’e iha erru konstrusaun fraze ne’ebé ladún perfeitu tanba haree liafuan ne’e ba loos mai loos, erru seluk mak uniforme no fotografia balun ladún iha kualidade di’ak.

“Ida ne’e presiza hadi’a. Ita Timór haree buat hotu di’ak maibé ba ema ne’ebé komprende no lee didi’ak iha liafuan balun lahan malu. Ida ne’e halo ita hakfodak, tanba ita hotu hatene portugés no inglés maibé iha erru ne’ebé mak sira fó hatene mai ita”, Anibal dehan.

Produsaun brosura kona-ba produtu timoroan nian ne’e, programa husi MKIA atu promove potensialidade Timor-Leste liuhusi brosura atu-bele fó informasaun hodi bele atrai ema mai Timor-Leste.

“Maibé falta kontrolu ne’ebé kompañia imprime dokumentu ne’e, hodi halo publikasaun hafoin asina hosi ministru, hetan mós reasaun maka’as hosi ema seluk kona-ba buletin ne’e rasik”, katak tan.

Bainhira sira lee iha erru barak mak sira dehan iha tradusaun Tetun ba Inglés no Portugués ladún haan malu no halo konfuzaun ema”, diretór ne’e relata.

Nune’e, ministériu rekolla filafali brosura ne’ebé fahe ona no bolu kedan kompañia hodi halo reuniaun hodi fó deklarasaun. Iha enkontru ne’e, kompañia Matadalan ne’ebé mak hetan projetu ne’e, prontu simu responsabilidade no halo impresaun filafali hafoin hadi’a erru ne’ebé iha boletin refere.

“Governu sente ida ne’e hanesan fallansu ida no kompañia tenke servisu hamutuk ho ministériu atubele hadi’a. Kompañia Matadalan prontu koopera ho ministériu atu sira bele imprime buletin foun mai entrega iha ministériu”, dehan Anibal.

Entantu, boletin ne’ebé fahe ona ne’e ministériu rekolla filafali ona no iha balun ne’ebé ema foti tiha ona no boletin balun ne’ebé haruka ona ba embaixada sira, ministériu haruka mensajen hodi halo kanselamentu ba distribuisaun  no hein fali republikasaun hafoin distribui fali.

“Kuantidade sei nafatin, maibé hadia de’it informasaun iha buletin laran. Sira simu responsabilidade ne’e sira prontu atu imprime filafali maibé sei servisu hamutuk ho ministeriu atu identifika ema ne’ebé hatene lia-portugés no inglés ho di’ak atu nune’e bele hala’o prosesu ne’e too remata”, katak tan.

Ministériu tenta rezolve ho kompañia tanba ne’e kompañia mós lainterese lakon ka manán maibé hakarak hadi’a ninia naran no prontu atu responsabiliza no lahusu atu aumenta osan maibé ho osan ne’ebé Simu ona ne’e bele hadia filafali sala ne’ebé halo ona. (jornalista: Maria Auxiliadora; editora: Rita Almeida)

HUSIK IDA HATÁN