Mate Isin Traballadór “Baltazar” Sei Lori Mai TL

0
107

Dili, (ANTIL) – Traballadór Timoroan Baltazar Almeida hosi Munisipiu Same neb’e servisu iha Koreia do Sul iha área Gumi, hetan dezastre ho kareta maibé la konsege salva nia vida iha Óspital Gumi. Nune’e, adidu Timor-Leste (TL) esforsa hela hodi trata dokumentu sira atu transporta mate isin mai Timor Leste.

“Traballadór mate iha Sesta, 27/01 tanba hetan dezastre ho nia kolega koreanu wainhira halo viazen servisu tamba xoke kareta ida ne’ebé para iha nia oin, neduni, esforsu ita nian mak aselera dokumentu sira hodi lori mate isin mai iha nia knua” informa Diretór Jerál ba Sekretaria Estadu Polítika Formasaun Profisionál no Empregu (SEPFOPE), Paulo Alves ba ANTIL iha nia servisu fatin Caicoli, Segunda (30/01)

Tuir nia, informasaun ne’ebé ami simu hosi adidu TL nian iha Koreia do Sul, mate isin fofoun iha óspital Gumi maibé muda ona ba óspital Sul ne’ebé iha sidade laran, atu nune’e bele fasilita trata dokumentu viazen nia mai TL.

Planu atu lori mate isin mai TL seidauk fiksu maibé parte SEPFOPE kontinua esforsa no husu nafatin ba adidu atu bele informa prosesu dokumentu hosi mate isin nia mai atu nune’e ita bele halo hela preparasaun wainhira mate isin to’o ona iha Timor.

Governu liu hosi SEFOPE sei entrega fila fali mate isin ba nia família wainhira mate isin to’o ona iha Timor.

“Nia servisu legál iha Koreia Sul hahu husi tinan 2015 iha fábrika no traballadór ne’e mate duni iha nia servisu, neduni sei la susar prosesa nia dokumentu, maibé husu nafatin ba adidu atu esforsu an hodi trata lalais” nia dehan

Traballadór timor oan neb’e servisu iha Koreia Sul mate ona hamutuk nain Walu,inklui iha Australia ema nain rua, balun mate tan dezastre kareta, mate iha roh laran, moras, tara-an. (Jornalista : Zezito Silva/Editor : Alberto ALves)

HUSIK IDA HATÁN