Maria Vitória La-Halo Konsertu iha Abertura LFA

0
169

DILI, (ANTIL) – Sekretáriu Ezekutivu Liga Futeból Amadora (LFA), Sergio Hornai hatete, LFA la-konvida artista famoza timoroan, Maria Vitória (MARVI), hodi halo konsertu iha abertura jogu dahuluk divizaun LFA iha Estádiu Baukau, Sábadu (18/2).

“Antes ne’e iha hanoin ida atu konvida ita nia artista nee maibé tanba tempu badak liu ona, entaun ami husik hela ba eventu seluk. Talvez iha jogu Super Tasa maka ami konvida Marvi,” Sergio dehan ba ANTIL via telefónema, Kuarta ne’e, bainhira nia hala’o hela nia kna’ar iha Munisípiu Baukau hodi koordena ho autoridade munisípiu ba eventu abertura jogu refere.

Nia esplika, iha sekuénsia hosi abertura ne’e, ida kona-ba animasaun maibé troka fali ho seremónia inaugurasaun Estádiu Baukau. Estádiu ne’e, Sergio haktuir, sei inaugura hosi Sekretáriu Estadu Juventude no Desportu, Leovigildo Hornai iha tuku 15:00.

Atuál Defensór Públiku ne’e hatutan, bainaka sira ne’ebé hola parte iha abertura no inaugurasaun estádiu ne’e maka deputadu sira hosi Parlamentu Nasionál, membru governu, prezidenti klubu futeból sira,  prezidenti klubu sira hosi modalidade desportu seluk, reprezentante ajénsia internasionál no korpus diplomátiku sira.

“Estádiu ne’e prontu ona no hein inaugura de’it. Tanba Estádiu ne’e propritáriu Estadu nian, entaun, hafoin inaugurasaun ramata, kompañia sei entrega ba Governu liuhusi Sekretária Estadu Juventude no Desportu (SEJD), atu halo nia administrasaun,” Sergio afirma. (jornalista: Xisto Freitas; editora: Rita Almeida)

HUSIK IDA HATÁN