LPV PN Haruka Ona Resposta Ba TR

0
54

DILI (ANTIL)—Parlamentu Nasionál, horseik, Segunda (20/02) submete ona pedidu esplikasaun kona-ba lei pensaun vitalisia (LPV) bazeia ba notifikasaun hosi Tribunál Rekursu (TR) nian.

Prezidenti Parlamentu Nasionál (PPN) Aderito Hugo da Costa espera katak ho ispelikasaun Parlamentu Nasionál (PN) nia bele ajuda Tribunál hodi hala’o nia kna’ar liu-liu fiskalizasaun preventiva, atu bele fó resposta ba Prezidenti da Repúblika.

“Tribunál notifika mai PN durante loron sanulu atu fó nia esplikasaun, ba asunto ne’ebé Prezidenti da Repúblika foti iha nia observasaun, tan ne’e mak resposta horseik ami haruka ona,” Prezidenti Parlamentu Nasionál Aderito Hugo da Costa esplika ba ANTIL  iha sala konfrensia Parlamentu Nasionál, Tersa (21/02).

Tuir Aderito Hugo asunto ne’ebé sai preokupasaun ba Prezidenti da Repúblika Taur Matan Ruak iha lei pensaun vitalisia, ida mak kona ba kestaun igualdade liu-liu tratamentu ba eis titular sira liga ba ejistensia rejime seguransa sosial kontributivu nian.

Nune’e mós kestaun igualdade ba tratamentu veteranus ho kargu polítiku sira iha âmbito pesaun nian.

Tan ne’e Aderito dehan, preokupasaun Prezidenti da Repúblika iha kontekstu ida ne’e refleta duni ba kestaun justisa sosial, ida ne’e nu’udar rajaun fudamental ida ne’ebé Prezidenti da Repúblika tenki halo antes toma desijaun ba lei pensaun vitalisia.

Entertantu hatan kona ba resposta enjeral PN nian ba notifikasaun, Prezidenti PN ne’e esplika katak, PN fó resposta ida halai liu ba difinisaun kargu polítiku ne’ebé iha ona lei proprio hahú iha 2007.

Esplika kona ba rejime naun kotributivu ne’ebé nakfilak ba rejime kontributivo inklui rejime ida ne’ebé kona-ba rekuñesimentu estadu nian ba kontribuisaun tempu rezistensia nian hanesan veteranus, faluk, oan-ki’ak sira.

PN mós halo esplikasaun klean kona ba referensia mundial iha implementasaun lei pensaun vitalisia nian ho hanoin ida atu konvense vontade popular ne’ebé hakarak ilimina lei pensaun vitalisia.

“Ami halo estudu lubuk ida, faktu hatudu kazu hanesan akontese iha Portugal, sira hakarak ilimina pensaun, maibé saida mak akontese ikus mai Tribunál mak la hatan, ho rajaun viola konstituisaun” Aderito Hugo kompara.

Hodi hatutan se Timor-Leste husu ilimina bele akontese mós hanesan Portugal tanba realidade iha ona ema balun mak benifisia ona antes ne’e ba direitu arkiridu tanba lei pensaun eziste kleur ona.

Iha parte seluk mós tuir Aderito haktuir katak, elimina ka la elimina benifisiariu lei pensaun vitalisia foun nian mai integra an ona iha polítika lei rejime seguransa sosial kontributivu ne’ebé implementa iha tinan ida ne’e.

Signifika kargu politiku sira nia futuru ba reforma determina hosi saida mak durante ne’e sira kontribui tuir lei lei rejime seguransa sosial kontributivu nian

Tanba nia dehan dezijaun hotu ita Prezidenti nia liman hodi halo veta ou promulga, maibé se veta mós PN sei iha tempu naton hodi halo hikas ajustamentu atu konfirma ba Prezidenti da Repúblika, tuir konstituisaun haruka. (Jornalista : Manuel Pinto).

HUSIK IDA HATÁN