ME : Lian Materna Uza nu’udar Estratéjia La’ós Polítika

0
73

DÍLI, (ANTIL)—Ministru Estadu Koordenadór Asuntu Sosiál no Ministru Edukasaun, António da Conceição hateten, projetu pilotu lian materna uza hodi fasilita iha eskola sira, hanesan ne’ebé aplika ona iha Munisípiu Lospalos, Manatuto no Oe-cuse ne’e, nu’udar estratéjia ida atu fasilita labarik sira hodi komprende siénsia liliu literásia nomós numerásia, la’ós polítika.

“Ita-nia opsaun ida tan atu bele tulun dezenvolve ne’e di’ak liu mak ita mós hakarak atu uza lian-inan ba labarik sira, atu bele ajuda labarik sira komprende, intende numerásia no literásia. Ida ne’e mak ita-nia objetivu. La’os polítiku maibé estratéjia ne’ebé mak ita uza atu mellora ita-nia lala’o edukasaun iha Timor-Leste,” hateten ministru António da Conceição iha nia intervensaun bainhira partisipa iha loron mundiál lian inan, iha Salaun Delta Nova, Díli, Tersa (21/02).

Ministru hatutan, Loron internasionál ba lian-inan ita konsidera katak lian materna, lian ida ne’ebé iha nia utilidade rasik, instrumentu komunikasaun atu lori ita hodi hato’o ba malu saida mak ita hakarak.

Ida ne’e mós fasilita ita atu lori ita ba unifikasaun ida, depois pensamentu husi ema ida ba ema seluk. Iha kontestu edukasaun ninian ita hahú ho projetu pilotu ida lian-inan ninian ne’ebé realiza dadaun iha munisípiu tolu, Lospalos, Manatuto no Oe-cuse.

“Hanesan edukasaun, tenke iha kreatividade ba oin tan, aumenta métodu ne’ebé oioin tan atu nune’e ita bele lori labarik sira ba entendimentu ida kona-ba disiplina ne’ebé mak nia efrenta,” afirma ministru edukasaun ne’e.

Ministériu Edukasaun, António da Conceição mós akresenta katak ita dehan unidade nasionál la’ós dehan ita ida de’it. Unidade iha diversidade, diversidade ida ne’ebé mós karakteriza ita mak dialetus, iha konstituisaun dehan língua.

“Ne’e duni, ha’u hakarak aproveita oportunidade ida ne’e hodi fó ha’u-nia apresiasaun ba serbisu ne’ebé mak sekretária ezekutiva ho nia ekipa hala’o, tutela iha Ministériu Edukasaun (ME) hodi bele kontribui nafatin iha Timor-Leste. UNESCO Timor-Leste, la’ós hanesan UNESCO Nova Yorke. UNESCO de Timor-Leste, UNESCO dos timorenses,” nia hateten.

Ho nune’e, nia reforsa, uza lian-inan la’ós polítika maibé nu’udar estratéjia hodi mellora sistema edukasaun iha Timor-Leste.

Iha fatin hanesan, Sekretária Ezekutiva Komisaun Nasionál ba UNESCO, Maria Angelina Lopes Sarmento hateten katak projetu pilotu lian materna hodi fasilita labarik sira iha eskola la halakon lian ofisiál maibé hanesan tranzisaun ida nune’e bele fasilita labarik sira komprende matéria.

Tanba ne’e, Sekretária Ezekutiva UNESCO ne’e hateten, UNESCO prontu apoia Ministériu Edukasaun hodi bele implementa programa EMBLI (Edukasaun Multilinge Bazea ba Lian Inan).

Loron mundiál lian-inan hala’o tinan-tinan iha 21 Fevereiru no UNESCO konsidera loron ida ne’e tanba bazea ba loron movimentu lian nian ne’ebé hala’o iha Bangladesh. Iha tinan ne’e, Timor-Leste komemora loron mundiál ba lian-inan nia ho tema : “Hasoru Futuru Sustentável Liuhusi Edukasaun Multilinge”.

Informasaun kona-ba lian materna bele mós asesu iha ne’e: http://antil.tl/lian-materna-fasilita-estudante-atu-komprende-materia-ho-lais/

(Jornalista:Rafy Belo)

HUSIK IDA HATÁN