Klubu Zebra Simu Realidade

0
35

DILI (ANTIL)—Maske lakon ho ekipa AD SLB Laulara 1-3 maibé  treinadór Zebra FC, Rogerio Moc hateten sira simu realidade no konsidera katak SLB preparadu no kombinasaun di´ak.

Moc hato´o kestaun ne´e ba jornalista sira iha Estádiu Baucau, Sábadu (18/2), hafoin ramata jogu abertura primeira divizaun Liga Futeból Amadora (LFA) époka 2017 entre AD SLB Laulara no Zebra FC.

Nia orgullu ho ninia jogadór sira tanba joga di´ak kompara ho époka kotuk. Sira nia mudansa konsege aumenta. Nia rekuñese katak sira fraku iha parte liña kotuk tanba jogadór defeza seidauk iha kombinasaun di´ak.

Iha jogu tuir mai ne´e, Moc informa, sira sei hadi´a sira nia frakeza no sei muda liña hosi 4-4-2 ba iha 4-3-3.

 Iha fatin hanesan, kapitaun Zebra FC, Helder Mota Ricardo “Ende” hateten sira lakon iha kombinasaun entre defeza, médiu no avansadu. Ida ne´e akontese tanba sira nia preparasaun limitadu loos.

“Hanesan uma na´in, ha´u senti tristi teb-tebes tanba loloos ami maka domina kampu maibé ema maka domina fali jogu. Maske ami bele lakon maibé fuan ne´e boot nafatin no ami sei prepara án ho di´ak iha jogu tuir mai,” Ende tenik. (Jornalista: Xisto Freitas/Editor : Alberto Alves)

HUSIK IDA HATÁN