KFF kuda ona Ai-parapa 550 iha Suku Hera

0
58

HERA, (DILI)- Prezidente Konservasaun Flora no Fauna (KFF), Alito Rosa informa, KFF kuda ona viveiru ai-parapa hamutuk 550 iha área tasi suku Hera, iha kompañia Esperansa Timor Oan (ETO) nia kotuk, atu proteje tasi ninin.

“Ami halo peskiza barak ona katak estragus komesa makás iha área tasi ninin, estrada balun iha tasi ninin, tasi been komesa han ona nune’e kuda ai-parapa tanba tahan área tasi ninin”, dehan Alito ba ANTIL, Sábadu (18/2/2017) iha Hera.KFF

Alito hatutan, planu KFF sei kuda mós iha área Metinaru nian iha loron 22/2/2017 tanba hetan mós estragus barak ona, nune’e tenke kuda ai-parapa barak.

Azevedo Varela, fundadór KFF informa, inisiativa ne’e oinsá atu proteje natureza iha Timor-Leste (TL) tanba hetan ona estragu.

Peskiza ne’ebé KFF halo, kada tinan TL lakon ai-parapa kuaze ektare 10 ba leten, kauza husi populasaun ne’ebé tesi ai-parapa hodi uza ba sunu nomós halo uma.

Atividade kuda ai-parapa ne’e husi membru KFF hamutuk 22, feto 7 no mane 15 ne’ebé tun hotu hodi halo serbisu ida ne’e.

(Jornalista : Maria Auxiliadora/Editor : Alberto Alves)

HUSIK IDA HATÁN