João Pedro Lori SLB Manan Zebra FC

0
70

BAUCAU (ANTIL)—Jogadór avansadu direita, João Pedro lori ninia klubu AD SLB Laulara manan Zebra FC ho golu 3-1. Golu tolu hosi SLB ne´e, João Pedro hatama golu rua no golu ida hatama hosi ninia belun Nídio Alves (24/def).

Golu primeiru nia hatama iha minutu 5. Golu ida ne´e hanesan resposta (balasan) ba Zebra nia golu dahuluk iha minutu 5. Nia (João) hatama golu ne´e ho di´ak hafoin serbisu hamutuk entre Frith (7) no Danilson (11) iha área grandeia adversáriu. Bola ho velosidade maka´as, nune´e baliza la konsege baku sai.

Oportunidade ne´ebé SLB hetan, motiva sira hodi joga di´ak liu-tan. Iha minutu 11, João Pedro hetan oportunidade maibé nia la konsege hatama ho di´ak tanba ho ansi nune´e nia la konsege fahe ba ninia belun Danilson (11) ne´ebé halai mesak iha grandeia.

Ekipa Zebra FC
Ekipa Zebra FC

Dala ida tan, oportunidade monu ba SLB. Liuhusi xutu bola falta, SLB muda ninia golu ba daruak iha minutu 30. Golu ida ne´e xutu hosi Nídio (defeza) no borus bareira ne´ebé iha no halo baliza la konsege salva bola tanba bola rai ho velosidade.

Maske SLB luta maka´as atu atinji tan golu maibé la konsege tanba avansadu no médiu avansadu hetan presaun maka´as, tan ne´e oportunidade ne´ebé sira hetan sempre baralla hosi defeza adversáriu. Ne´e duni, golu rua ne´e termina jogu primeira parte.

Entretantu, iha primeira parte, Zebra FC hatudu ninia jogu rigór. Sira uza sistema bola long no lais nune´e iha minutu 2 de´it, sira hatama ona golu. Golu ezekuta hosi jogadór médiu avansadu, Marcos (25), iha ne´ebé nia (Marcos) hetan pasajen bola ne´ebé furak hosi Juvencio Castro (9) iha fora área grandeia adversáriu. Marcos nia xutu ne´e bola rai no velosidade entaun defeza no baliza la konsege salva.

Loloos, Zebra iha oportunidade barak atu halo golu maibé komunikasaun entre médiu no avansadu ladun di´ak. Komunikasaun la efetivu. Tanba, pasajen bola hosi ain ba ain sempre distúrba hosi adversáriu tanba book an tarde.

Ekipa SLB Laulara
Ekipa SLB Laulara

Iha segunda parte, koordenasaun entre defeza, médiu no avansadu grave liu-tan. Sira kuaze laiha komunikasaun, tan ne´e halo sira la hetan oportunidade hanesan iha primeira parte atu halo golu. Jogadór ida-idak lori bola maibé la ho objetivu klaru atu hatama oinsá.

Haree ba frakeza ne´e, fó oportunidade di´ak ba SLB hodi domina bola. Domina bola la saugati. Iha minutu 76, João Pedro liki bola iha fora grande area hodi atinji tan golu ida sai 3-1. Golu ida ne´e akontese tanba baliza baku sai bola mai iha área grandeia hodi fó oportunidade ba João Pedro ne´ebé halai mesak besik grande area sein ataka hosi defeza.

João Pedro ninia prestasaun ne´e, halo nia hetan obstáklu iha kampu. Nia hetan tebe iha ain loos hosi médiu adversáriu (17) to´o naksalak no halo nia labele kontinua ninia jogu to´o ramata. Nia hetan troka emidiata hosi ninia belun Efrem (9). Aleinde João, jogadór médiu Frith (7) mós aleja tanba hetan tebe hosi defeza adversáriu.                    S

Line up Zebra: Messias do Carmo (20), Emiliana Parada (5), Filipe Ribeiro (27/defeza), Pablo da Silva (6/defeza), Júlio de Jesus (2/defeza), Helder Mota (7/médiu), Joel Gaio (8/médiu), Marcos de Lima (25/médiu), Gaspar Ximenes (11/médiu), Juvencio Castro (9/avansadu) no Alipio Viana (14/avansadu). Treinadór, Rogério Moc.

Line up SLB: Fernando da Costa (1/def), Nídio Alves (24/def), Julião Mendonça (3/def), Gumário A.F.M (4/def), Zermias Baptista (12/def), Carlos Magno (8/med), João Frith (7/med), Filomeno V. Da Costa (16/med), João Pedro F. (10/med), Danilson Araújo (11/avd), Yohanes K. Gusmão (19/avd). Treinadór, Kim Sain Awan.

Ekipa arbitrazen

  1. Nívio Fernandes (árbitru)
  2. António de Carvalho (juis liña 1)
  3. Filomeno da Silva (juis liña 2)

(Jornalista: Xisto Freitas/Editor : Alberto Alves)

HUSIK IDA HATÁN