Imigrasaun Atambua Entrega Hikas Membru UPF Kapturadu

0
103

DILI (ANTIL)—Servisu Imigrasaun Atambua (Timor Osidental) hafoin halo kapturasaun ba membru Unidade Polísia Fronteira  (UPF) nain rua ho sidadaun Timoroan ida iha loron Kuarta (22/02), Sesta (24/02) imigrasaun Atambua entrega ema nain tolu ne’e ba imigrasaun Timor-Leste ne’ebé simu hosi Miguel da Costa reprezentante Imigrasaun Timor-Leste iha Mota-Ain.

Tuir fontes Embaixada Republika Indonesia (KBRI) Timor-Leste iha Dili haktuir katak, ema nain tolu ne’e Servisu Intelijensia Komandu Resort Militar (Intelrem) Nusa Tenggara Timur (NTT) kaptura iha Suku Serabau, postu administrativu Tastim, Munisipiu Belu iha Kuarta (22/02) entre nain tolu, nain rua nu’udar membru UPF.

“Sira nain tolu intelizen ka’er ho gazolina jerigen mais ou menus 105 Litru, speaker ativu 2 no lampu motor Vixion nian ida, maibé intrega hikas ona,” Fontes KBRI informa ba ANTIL iha nia kna’ar fatin, Dili, Tersa (28/02).

Nia dehan tan tuir lei internasional bandu tebes atu sidadaun nasaun seluk tantu militar ou polísia no sidadaun tama ema seluk nia nasaun sein iha dokumentus ofisial, maibé iha kazu ida ne’e Indonézia hatudu sentidu amizade hodi intrega hikas ema nain tolu ne’e tanba lakohi hafoer relasaun bilateral entre Timor-Leste ho Indonézia tanba sira nain tolu nia atetude.

Kronolojia:

Iha loron Kuarta, 22 Fevereiru 2017 oras 15.30 otl iha suku Sarabau postu administrativu. Tastim Municipiu  Belu ekipa Intelrem 161/WS kaptura sidadaun nain tolu hosi Timor-Leste ne’ebé hakat liu ilegalmente area fronteira sein iha dokumentu ofisial hanesan  pasaporte.

Iha oras 14.00 otl Intelrem simu ona informasaun katak, dala wain tebes ema tama ilegalmente hodi lori sai gazolina liuhosi dirasaun Atambua ho kareta Bemo no motor ojek.

Iha tuku 15.30 otl Intelrem sira to’o iha fatin kapturasaun mosu mai Bemo ho numeru matrikula DH 1828 EB intelrem sira hahu deskonfia ho nune’e sira hapara kareta refere hodi halo cek point bainhira halo cek point hetan Gazolina jergen 3, 105 litru, Speaker aktivu 1 no lampu motor Vixion nian ida.

Intelrem bainhira husu ba pasagerus sira iha kareta laran, iha pasagerus nain ida mak lahatene koalia lian Indonezia, depois pasagerus nain tolu ne’e hetan kedan hosi intelrem. Sira nain tolu mak hanesan tuir mai ne’e;

Alexo Godinho, 25 anos , relijiaun Katolik, profisaun: UPF, hela Dili nia tama ilegalmente tanba hakarak sosa ekipamentus motor nian (tama la ho Pasaporte).

Leonel Martins Belo, 22 anos, relijiao Katolik, Profisaun UPF, hela Baucau. Tama ilegal hakarak sosa material motor nian (la iha pasaporte mós).

Mateus Vegas, 35 anos, Katolik, Profisaun agrikultor, hela iha Maliana. Tama ilegal atu sosa Speaker ativu (iha kartaun atravesa fronteira).

Hafoin halo kapturasaun iha oras 16.00 otl intel sira kontaktu kedan ba parte imigrasaun ho naran Gunawan hodi halo konsultasaun ba prosesu tuir mai nian

No iha 16.40 otl ema nain hat hosi imigrasaun Atambua ne’ebé lidera dipimpin hosi Fandy F Nugraha to’o iha fatin kapturasaun hodi halo prosesu liu-liu verifika dokumentus.

Iha 17.00 otl to’o iha fatin kapturasaun. Goris (seguransa Pos Imigrasi Turiskaen) hodi informa katak iha oras 10.00 otl Pos Imigrasi la iha seguransa tanba ne’e mak ema nain tolu ne’e hakat liu tiha pos imigrasaun.

Hafoin minutu 30 nia laran oras 17.30 otl sidadaun Timor nain tolu ne’e intelrem sira ho imigrasaun lori ba edifisiu Imigrasaun Atambua.

Jornalista: Manuel Pinto / Editor: Alberto Alves

HUSIK IDA HATÁN