Governu Produz ona Batar Fini Lokál Tonelada 112

0
44

DÍLI, (ANTIL) -Sestu governu konstitusionál durante tinan rua produz no multiplika ona batar fini lokál tonelada 112, batar fini ho alta produsaun tonelada 50, hare fini ne’ebé hetan sertifikadu tonelada lima, fore-rai fini ne’ebé hetan sertifikadu tonelada 11 no aifarina ailuka ne’ebé hetan sertifikadu tonelada rua, hare fini ho variedade inan-horis ho fekundasaun 500kg, batar 1200kg, fore-rai 2.500 kg, fehuk-midar kain 200.000 no ai-fariña kain 150.000.

Dadus informasaun ne’e fó sai husi xefe governu konstitusionál, Rui Maria de Araújo ba profisionál komunikasaun sosiál sira iha Palácio do Governo, Díli, Sesta (17/02) iha ámbitu aprezentasaun rezultadu serbisu sestu governu konstitusionál liliu iha setór ekonómiku.

Iha dadus ne’e mós refere katak alende produz batar fini lokál, produz mós fini komersiál (batar no haree) hanesan batar fini variedade sele tonelada 12, noi mutin tonelada haat no nai tonelada sanulu, haree fini komersiál tonelada 175 no batar tonelada 250, harii ona asosiasaun 73 (hare no batar), produz ona haree fini komersiál 175 no batar tonelada 250.

“Ita benefísia ona xefe família na’in 183.330 no fó ona treinamentu, monitorizasaun, akompañamentu no sorumutu ba klibur agrikultór sira,” informa xefe governu.

Dadus seluk, xefe governu mós informa katak governu sosa ona hare fini variedade lokál tonelada 80, hare to’os tonelada 15, variedade nakroma tonelada 225, batar lokál tonelada 100, batar alta produsaun tonelada 50, fertilizante orgániku tonelada 17, fertilizante naun-orgániku tonelada 350, pestisida litru 17.000, fehuk eropa tonelada 12, forekeli tonelada 30, foremungu tonelada lima, fore-rai tonelada 30 no unidade ekipamentu hortikultura 5.263 ne’ebé sei fahe ba agrikultór sira.

Tuir mai, governu realiza ona vizita iha loron serbisu nian hamutuk 180 ba estensionista, ba agrikulór sira,ba formasaun hodi benefísia ema na’in 633 kona-ba prátika di’ak agrikultura nian.

“Ita fó ona apoiu ba klibur feto no klosan hamutuk 226 (klibur hortikultura 66, klibur hare 26, klibur batar 49, klibur akuakultura 25, klibur haki’ak fahi 24, klibur haki’ak karau 22 no klibur haki’ak bibi 14) iha munisípiu 12,” haktuir eis ministru saúde iha primeiru konstitusionál ne’e.

Seluk, alende vizita serbisu, governu mós remata ona faze daruak irigasaun Oebaba (Covalima), Raibere (Ainaro), Carau-ulun (Manufahi) no Bulutu (Manatuto), hahú ke’e bee-lolon irigasaun tono iha Rejiaun Administrativa Espesiál Oe-cusse, Ambeno, iha Larisula iha Postu Administrativu Baguia (Baucau) no Bilimau.

Dezeñu no BoQ (Bill of Quantity) irigasaun nian sira iha Galata (Baucau) no iha Dardau (Viqueque) ADN (Autoridade Dezenvolvimentu Nasionál) halo hela verifikasaun. Estudu kona-ba viabilidade DAM SITE nian (barajen ba tada bee nian) hato’o on aba ADN.

Iha sorin seluk kona reflorestasaun, sestu governu konstitusionál fahe ona ai-fini moris hamutuk 270.000 atu kuda iha área ida ho totál hektár 432 iha munisípiu 12. Nune’e mós, produz ona fini moris ai-kameli 2.00, fini-moris aiteka huun 10.000, fini-moris ai-sarin huun 20.000, fini-moris ai-mogno huun 30.000, fini-moris ai-kakeu huun 27.953, fini-moris ai-albizia huun 7.000. fini-moris ai-kasi mean huun 3.000, fini-moris ai-nem (nimba) huun 3.00, fini-moris ai-teka mutin huun 2.500, fini moris ai-gamal huun 2,500, fini-moris ai-kafé fuik huun 2.500.

Inklui, fini-moris ai-marungi huun 1.500, fini-moris kulu-jaka huun 2.000, fini-moris sabraka huun 3.000, fini-moris abakat huun 3.000, fini-moris kulu-modo huun 1.000, fini-moris há huun 3.000, fini-moris ai-turi huun 2.000, fini-moris ai-ketapan huun 1.3200, fini-moris ai-Portugal huun 1.500, fini-moris ai-tebabuia huun 1.500, fini-moris ai-xamplo huun 1.500, fini-moris ai-matan dukur huun 1.547, fini-moris ai-dila huun 6.680 iha viveiru Maubara nian.

Atu konklui, Primeiru-ministru Rui Maria de Araújo haktuir katak sestu governu konstitusionál mós produz ona fini-moris ai-kafé huun 904.000 no fini-moris ai hirak ne’e fó mahon iha sentru viveiru kafé no fini-moris ai hirak industrial (kakau = huun 150.000, nú = huun 15.600, baunilla = huun 111.110, noz Índia (kami = huun 15.600., kraviñu = huun 5.560).

Tuir mai, governu sosa no fahe tiha ona doze vasina SE nian rihun 487 (karau timur no karau vaka), doze vasina CSF rihun 340 (fahi) no vasina ND (manu) rihun 803.

Seluk mak hahú ona harii sentru formasaun peskas (to’o ona 40%) no hada ona tanke foun ba haki’ak tilapia hamutuk 113. Nune’e mós, fahe fós tonelada 6.457 hodi apoia programa Merenda Eskolár (ME) no fó karon 2.190 hodi apoia umanitáriu (hamutuk hoMinistériu Solidaridade Sosiál (MSS)).

(Jornalista: Rafy Belo/Editor : Alberto Alves)

HUSIK IDA HATÁN