Governu Observa Kondisaun Gráfika Nasionál

0
29

DILI, (ANTIL) – Governu liuhosi Ministru Administrasaun Estatál (MAE), Dionísio Babo Soares, orgaun tékniku eleitorál, Acilino Manuel Branco, orgaun supervizaun, Alcino Barris no Sekretariu Estadu Konsellu Ministru, Avelino Coelho haree besik kondisaun gráfika nasionál atu bele responsabiliza imprime buletim votu ba eleisaun prezidensiál.

16754742_1238341766247292_1110159140_n
Ministru Administrasaun Estatál (MAE), Dionísio Babo Soares, Direitór Jerál STAE, Acilino Manuel Branco, Prezidenti Komisariu CNE, Alcino Barris hamutuk ho ekipa observasaun haree besik kondisaun makina imprime iha Grafika Nasionál, Kolmera Dili, Kuarta, (15/2). Foto ANTIL/Zezito da Silva

“Tuir observasaun ami nian hatudu katak gráfika nasionál ho kondisaun di’ak atu bele halo imprime buletim votu”, Ministru Administrasaun Estatál, Dionísio Babo Soares ba ANTIL iha Gráfika Nasionál Kolmera Dili, Kuarta, (15/2).

Iha fatin hanesan, Diretór Jerál STAE, Acilino Manuel Branco hateten, vizita ne’e atu haree kondisaun mákina no kapasidade rekursu atu imprime buletim votu, nune’e bele garante kualidade tanba materiál buletim sensitivu hosi materiál sira hotu.

Bainhira bulletin votu mak kandidatu sira naran la-mos, fotografia malahok ema la-tau konfiansa, atu evita erru sira, tenke haree kondisaun iha kontestu ekipamentu pesoál atu produz duni bulletin votu ne’ebe kualidade.

Tenke haree mós sistema kontrolu no seguransa tanba imprisaun materiál sensitivu sei hetan seguransa hosi Polísia Nasionál Timor Lorosa’e (PNTL), sei hetan fiskalizasaun hosi fiskais kandidatura sira no hetan observasaun hosi observadór nasionál no internasionál.

Atu halo imprime buletim votu, tribunál rekursu aban halo sorteiu hafoin kontaktu reprezentante kandidatura atu hatama fotografia, emblema no simbolu seluk ne’e sira hakarak tau ba buletim hafoin submete ba Comissão Nacional das Eleições (CNE) atu aprova.

Tuir planu, Diretór Jerál STAE informa, imprimisaun buletim votu bele iha loron 24 Fevereiru to’o 12 ou 13 Marsu, materiál buletim tenke entrega ona ba STAE atu distribui ba estranjeiru no munisípiu sira. (jornalista: Zezito Silva; editora: Rita Almeida)

HUSIK IDA HATÁN