Funsionáriu AIFAESA Simu Pose

0
99

DILI, (ANTIL)- Funsionáriu Autoridade Inspesaun no Fiskalizasaun ba Atividade Ekonómika, Sanitária no Alimentár, Instituisaun Públika (AIFAESA, I.P) hamutuk 41 ne’ebé Simu tomada pose husi Primeiru Ministru (PM), Rui Maria de Araújo iha loron 20/2/2017 tenke servisu ho disiplina no rigór.

Koordenadór AIFAESA, Abílio Oliveira ba ANTIL iha Matadouru informa, tanba servisu ne’ebé hala’o tenke la’o tuir oras ne’ebé determina hanesan funsionáriu no halo servisu tuir dalan no labele halo buat oioin. Tanba ne’e, hotu-hotu servisu atu hatudu ba populasaun katak liafuan ida dehan autoridade tenke hatudu hanesan autoridade.

Funsionáriu sira tenke kumpri sira-nia devér husi dekretu lei ne’ebé hamonu AIFAESA iha departamentu lima, divizaun no seksaun iha ninia knaar ne’ebé funsionáriu ida-idak hatene tiha ona.

Liuhusi pájina ofisiál Gabinete Primeiru-Ministru (GPM) ne’ebé ANTIL asesu, PM hato’o ba empozadu AIFAESA nian tenki serbisu ho profisionalizmu, disiplina ho rigór atu nune’e bele kontribui ba dezenvolvimentu Estadu no nasaun.

“AIFAESA hamriik hodi marka tan pasu ida ba oin iha prosesu konstrusaun Estadu no Nasaun ninian liuliu iha ámbitu oinsá atu reforsa liután dezenvolvimentu ekonómiku”, PM dehan.

Rui Maria Araújo husu ba funsionáriu sira atu halo serbisu ho onestidade wainhira halo inspesaun ruma no sai hanesan autoridade iha sira-nia knaar lorloron nian.

Iha tomada pose ne’e, funsionáriu sira mós simu termu servisu ne’ebé klaru atu ida-idak hala’o nia servisu. Funsionáriu AIFAESA ne’ebé Simu pose ne’e mai husi Departamentu Planeamentu, Risku Alimentasaun no Loboratóriu, Departamentu Operasionál, Departamentu Metrolojia no Padronizasaun, Departamentu ba Asuntu Juridiku no Kontraordenasaun nomós Departamentu ba Administrasaun no Finansas. (Jornalista : Maria Auxiliadora/Editor : Alberto Alves

HUSIK IDA HATÁN