FC Porto Taibessi Lakon 0-5 ho AS Ponta Leste

0
57

BAUCAU (ANTIL)—Sorte át monu ba FC Porto Taibessi. Iha jogu primeira divizaun Liga Futeból Amadora (LFA) époka daruak ne´ebé hala´o iha Estádiu Munisipál Baucau, Domingu (18/2), FC Porto Taibessi derrota (lakon) 0-5 ho AS Ponta Leste.

FC Porto hetan derrota tanba krizi ba kualidade jogadór. Iha liga époka daruak ne´e, klubu refere mosu ho jogadór mesak foun de´it ne´ebé menus esperiénsia iha kompetisaun. Jogadór seniór hirak ne´ebé joga iha LFA époka primeiru, namkari hotu ba klubu seluk tanba problema diferensa ideia iha klubu laran.

Problema ida ne´e, fó implikasaun maka´as ba FC Porto bainhira hasoru AS Ponta Leste. Jogu durante minutu 90 nia laran, FC Porto la hetan oportunidade atu bele rezulta golu tanba jogadór avansadu, defeza no médiu fraku tebes. Lakon koordernasaun no komunikasaun iha kampu.

Ekipa FC Porto Taibessi. Foto Mídia LFA
Ekipa FC Porto Taibessi. Foto Mídia LFA

Entretantu, liña hosi AS Ponta Leste produtivu tebes. Liña hotu-hotu funsiona ho di´ak. Iha jogu primeira parte, Ponta Leste hatún liña segundu no liña ida ne´e konsege rezulta golu rua. Iha sigunda parte, sira hatun liña primeiru no liña ida ne´e mós konsege rezulta golu tolu sai golu lima.

Golu primeiru oferta hosi jogadór avansadu Ricardo Maia (9) iha minutu 15, jogadór médiu avansadu hosi Japaun, Shota (10) iha minutu 43, Silveiro Garcia (27) hatama golu rua iha minutu 83 no 86 no Ricardo Maia iha minutu 90+1.

Asistente Treinadór FC Porto Taibessi, Miro Valdo Bento konsidera katak rezultadu ne´e grave ba sira maibé ne´e normál tanba tuir kondisaun jogadór. “Ekipa boot hanesan Ponta Leste maka lakon 5-0 karik, bele mosu problema maibé ami maka lakon ne´e normál tanba ami nia kondisaun ladi´ak,” Miro informa.

Derrota ida ne´e, tuir nia, hanesan lisaun ba sira para ba oin sira hadi´a án di´ak liu-tan. Nia informa, sira sei hadi´an án liuhusi treinu fíziku no tempu besik jogadór estranjeiru na´in rua sei mai haforsa sira nia liña.

Ekipa AS Ponta Leste. Foto Mídia LFA
Ekipa AS Ponta Leste. Foto Mídia LFA

Aleinde ne´e, Treinadór AS Ponta Leste, Eduardo Pereira informa katak nia senti orgullu ho rezultadu ne´ebé sira hetan. Maibé, tuir nia katak jogu foin maka hahú ne´e duni klubu hotu-hotu sei prepara án di´ak liu-tan.

“Rezultadu ne´e sai motivasaun ba ha´u nia jogadór sira para prepara án di´ak liu-tan iha jogu tuir mai tanba jogu tuir mai sei hasoru ekipa zigante iha Dili laran, Karketu Dili FC,” Eduardo esklarese.

Line up FC Porto Taibessi: Leonel dos Anjos (1/def), Francisco de C. Amaral (3/def), José Gomes (13/def), Delio Sarmento Viegas (4/def), Alberto da Costa Fernandes (29/def), José João Pereira (6/méd), Armindo Correia (15/méd), Nazario do Carmo (21/méd), José Martins do Rego (22/méd), Venceslau F. Guterres (11/avd), António d. C. Xavier (22/avd). Asistente Treinadór, Miro Valdo Bento

Line up AS Ponta Leste: Aderito Fernandes (94/bal), Ezequiel Fernandes (15/def), Lamberto Gama (19/def), Cândido Oliveira (4/def), Tomás Sarmento (23/def), Dan Ito (31/méd), João Paulino (16/méd), Shota Tokunaga (10/méd), Expedito Soares C. (17/méd), Chiquito do Carmo (14/avd) no Ricardo Maia (9/avd). Treinadór,  Eduardo Pereira

Ekipa arbitrazen:

  1. Aniceto Goveia (árbitu)
  2. António de Carvalho (juis liña 1)
  3. Filomeno Silva (juis liña 2)

 

(Jornalista: Xisto Freitas/Editor : Alberto Alves)

HUSIK IDA HATÁN