Difisiente Matan Husu Governu Prepara Ema Indepéndente iha Eleisaun

0
29

DILI, (ANTIL) – Difisiente matan liuhosi Prezidenti East Timor Blind Union (ETBU), Domingos Gusmão husu ba Sekretariadu Tékniku Administrasaun Eleitorál (STAE) ou Comissão Nacional de Eleições (CNE) atu prepara ema indepéndente hodi akompaña difisiente matan sira bainhira deside sira nian hakarak.

”Ezemplu, bainhira ema ho difisiensia matan hakarak eskolla partidu B maibé akompaña hosi ema ho partidu A, entaun ida ne’e hanesan duvida ida ba ami”, Domingos nu’udar difisiente matan ba ANTIL iha ninia servisu fatin Mascarenhas Dili, foin lalais ne’e.

Tanba ne’e, husu ba STAE no CNE atu hola konsiderasaun. Se la’e, ema ho difisiente matan la-sente vota hanesan segredu ba sira.

Nia husu iha futuru atu oinsá bele produs buletin votu ho template ba ema ho difisiente matan.

Tuir dadus sensus 2015, ema ho difisiensia matan hamutuk 24.260. Sira ne’ebé ho tinan 15 to’o 17 hamutuk 255, tinan 20 to’o 24 ema nain 237, tinan 25 to’o 29 nain 300, hosi 30 to’o 34 nain 294, tinan 39 to’o 30 hamutuk 372, hosi tinan 40 to’o 44 hamutuk 1100, tinan 50 to’o 54 hamutuk 1848, hosi 55 to’o 59 hamutuk 1838, hosi 65 to’o 69 hamutuk 4063, hosi 70 to’o 74 ema nain 3573, hosi tinan 75 ba leten hamutuk 5037.

Hosi númeru ne’e, ema ho difisiente matan ne’ebé hatene lé no hakerek ho letra Braille tuir dadus ETBU nian mak maizumenus ema 100. (jornalista: Rita Almeida/Editor : Alberto Alves)

HUSIK IDA HATÁN