Bainrua, Lansamentu Liga Nasionál Basketból Timor-Leste

0
32

DILI (ANTIL)—Primeiru Ministru, Dr. Rui Maria de Araújo sei halao serimonia lansamentu Liga Nasionál Basketból Timor-Leste (LNBTL) iha kampu basketeból (out doot), Jináziu Dili, Sesta (24/02) tuku 16:00.

Liga Nasionál Basketeból Timor-Leste harii iha 19 Outubru 2016, nu´udar órgaun desportu modalidade basketból nian, atu hala´o atividade basketból iha Timor nune´e bele hasa´e foinsa´e sira nia talentu iha área desportu espesialmente basketból.

“Liuhusi LNBTL sei haburas foinsa´e sira nia talentu , hakle´an abilidade basketból iha ita nia rain, nomós sei identifika fini hodi prepara án ba tuir kompetisaun iha Timor nia laran no tuir mai atu buka hetan prestasaun iha nível internasionál,”  Prezidenti LNBTL, Rui Manuel Castro hato´o lia hirak ne´e ba jornalista sira liuhusi konferénsia ba imprensa ne´ebé hala´o iha gabinete LNBTL, Jináziu Dili, Kuarta ne´e.

Aleinde lansa LNBTL, Primeiru Ministru mós sei inaugura eskritóriu LNBTL. Eskritóriu ida ne´e harii ho kontainer-cobe house haat ne´ebé apoiu hosi Ministériu Finansas.

Kompetisaun liga refere sei hala´o iha sábadu no domingu, hahú 25 Fevereiru 2017 iha Jináziu Dili durante fulan sira nia laran. Provizoriamente, sei asisti ho gratuitu no hafoin fulan tolu sei aplika tikete ba adeptu sira.

Klubu sira ne´ebé partisipa iha liga ne´e hamutuk 22 (feto no mane) maka hanesan Klubu União (feto no mane), Ponta Leste (feto no mane), Wild Cats (feto no mane), AD SLB (feto no mane), Académica (feto no mane), Benfica (feto no mane), Caesar Dante (feto no mane), Salazar, DIT, Citra Mares (feto no mane) no Ultramar (feto no mane).

“Atu realiza atividade ida ne´e, Órgaun Liga hala´o tiha ona programa treinamentu báziku ba treinadores basketból na´in haatnulu resin tolu (43), no daudaun ne´e realiza hela ezersísiu treinamentu ba árbitru na´in sia (9). Liuhusi treinamentu ne´e, hanesan kapasitasaun ho atu foti nível kuñesimentu treinadór no árbitu sira,” Prezidenti Komisaun Organizadora LNBTL, Florindo Pereira dehan kestaun ne´e iha konferénsia ba imprensa. (Jornalista: Xisto Freitas/Editor: Alberto Alves)    

HUSIK IDA HATÁN