UNTL Sai Vensedór ba Kompetisaun Ideia Inovativu

0
57

DILI, (ANTIL) – Estudante Universidade Nasionál Timor Lorosa’e (UNTL), Fakuldade Ekonomia no Jestaun, Departamentu Siénsia Ekonomia, Maria Assunção Correia sai nu’udar vensedór dahuluk ba kompetisaun ideia inovativu kona-ba halo produsaun no merkadoria ba produtu surisu ho valór 276 husi juri sira ne’ebé halo avaliasaun ba aprezentasaun konkorente.

Vensedór daruak  mak Josefina do Rosario de Jesus husi Universidade Oriental Timor-Leste ho ideia inovativu uza produtu lokál ai-fuan ba halo jús ho valór 275 no datoluk, Noela Beatriz da Silva husi UNTL ho valór 265,  ideia inovativa ba inkubadora no produsaun manu lokál.

“Ideia inovativu di’ak tebes tanba halo ita dezenvolve ba faze ne’ebé mak hakarak, ho ida ne’e, ha’u aprezenta ideia kona-ba surisu tanba iha fahi barak maibé sira laiha hanoin atu halo valór akresentadu, nune’e mak ha’u ho inisiativa hodi halo surisu para bele hetan valór akresentadu husi fahi ne’e”, Maria hatete iha Arkivu Muzeu Rezisténsia Timorense, Kuarta (16/11) hafoin partisipa kompetisaun hodi selebra loron feto empreendedora.

Tuir nia, kompetisaun ideia inovativu ne’e di’ak tebes atu nune’e, sira bele prepara-án di’ak sai empreza na’in. “Antes halo aprezentasaun ami tuir metodolojia aprezentasaun ba negósiu no tuir treinamentu durante loron rua atubele preparadu ba aprezentasaun”, katak tan.

Premiu ne’ebé hetan husi kompetisaun ne’e mak get a mentor signifika vensedór sira sei hetan mentor ida atu implementa sira-nia ideia ho gratuita durante tinan ida nia laran.

“Ho mentor bele ajuda sira-nia business plan no fasilita sira atu hetan dalan ba asesu iha finanseira no akompaña sira atu implementa sira-nia negósiu ho di’ak atubele kria negósiu tuir duni ideia ne’ebé mak iha no business enviroment iha Timor-Leste”, Hergui Lina Fernandes Alves nu’udar komisaun organizadora hatete.

Kompañia ne’ebé voluntariamente atu sai mentor ho gratuita durante tinan ida nia laran ba vensedór na’in-3 mak husi Investe people, Hama Consultoria no Conecto. (jornalista: Maria Auxiliadora; editora: Rita Almeida)

HUSIK IDA HATÁN