Uma Amérika Hanesan Plataforma Relasaun Entre EUA ho TL

0
56

DILI, (ANTIL) – Embaixadora Estadus Unidus Amérika iha Timor-Leste, Karen Stanton hatete, besik tinan ida liu ba sira hakbesik ba reitór Universidade Nasionál Timor Lorosa’e (UNTL), Francisco Miguel Martins hodi ko’alia kona-ba posibilidade Uma Amérika iha UNTL, atu sai hanesan plataforma relasaun entre ema no instituisaun EUA no TL.

“Agradese ba kompromisiu reitór no ninia ekipa, serbisu maka’as tebes, koordenasaun barak entre embaixada no UNTL nune’e konsege harii Uma Amérika ne’e,” Karen hatete perante estrutura UNTL, akadémiku no ilustre konvidadu sira iha UNTL, Kuarta, (16/11).

Embaixadora ne’e haktuir, tempu ne’ebá ideia atu loke Uma Amérika ne’e haree hanesan susar oituan no nia parte laiha serteza katak planu ne’e sei sai realidade.

Funsionáriu Uma Amérika no Voluntáriu sira hasai foto hamutuk iha obra “Gembel Arts Collcetive” iha serimónia lansamentu Uma Amérika iha UNTL, Kuarta (16/11).// Foto Media EUA
Funsionáriu Uma Amérika no Voluntáriu sira hasai foto hamutuk iha obra “Gembel Arts Collcetive”. Foto Mídia EUA

“Ami espera katak imi hotu sei sai membru ativu, parseiru no belun Uma Amérika nian, ami simu ema hothotu atu gosta pájina facebook Uma Amérika nian, nune’e imi bele iha kontatu nafatin no haree kalendáriu ba atividade sira ne’ebé tuir mai,” Embaixadora katak.

Nia mós garante no espera, sei iha planu boot liu tan, se Washinton laran di’ak hodi fó rekursu bele kapasita Uma Amérika hodi hetan wifi alta velosidade, harii Uma Amérika sai sentru prinsipál país ne’e nian ba debate, dezeñu no inovasaun sira no halo Uma Amérika ne’e sai sentru peskiza, maibé ida ne’e depende ba ema hotu nia hanoin, apoiu, parseria no envolvimentu.

Nia enkoraja ema hotu atu halo vizita hodi hatene fasilidade no programa sira, informasaun, hato’o ideia atu harii relasaun ne’ebé forte ne’ebé Amérika iha ona ho TL.

Reitór UNTL, Francisco Miguel Martins hatutan, sentru ne’e alende ba UNTL ba mós públiku, Timor tomak la’ós ba de’it profesór sira, dosente nomós tekníku administrativu UNTL nian.

“Se de’it mak hakarak hetan koñesimentu, hakarak buka informasaun kona-ba Amérika,  kona-ba kultura, istória, bolsu estudu ba Amérika nian sira bele mai hetan asesu”, reitór informa.

Kona-ba jestaun, dadaun ne’e fatin sei ki’ik, maibé buka esforsu atu halo boot no di’ak liutan iha futuru tanba ne’e, maske ki’ik oan maibé importante komesa ona.

Uma Amérika agora halo parte ba família besik atus hitu American Corners, sentru no biblioteka iha mundu tomak ne’ebé ho sira nia kompromisiu atu fó informasaun kona-ba edukasaun Amérika nian no oportunidade ba bolsu estudu sira, organiza eventu kulturál no programa informasaun kona-ba EUA, fó apoiu estudu no hanorin lian ingles, envolve antigu alunu programa interkambiu nian.

Nune’e mós, fó espasu ida livre ba peskiza akadémika, diskusaun no debate inklui ho asesu livre ba dadus estensivu biblioteka eletrónika nian. (jornalista: Rafy Belo; editora: Rita Almeida)

HUSIK IDA HATÁN