STAE Halo Ona Verifikasaun Dokumentu Kandidatura PR

0
34

Dili, (ANTIL) – Sekretariadu Tékniku Administrasaun Eleitórál (STAE) halo ona verifikasaun dokumentu sira hosi kandidatura Prezidente Repúblika, José Antonio Neves no Amorim Vieira.

Informasaun ne’e hato’o hosi Diretór Jerál STAE, Acilino Manuel Branco ba ANTIL iha nia servisu fatin, Caicoli, Sesta, (27/01), relasiona ho tribunál rekursu ne’ebé hato’o dokumentu sira ba STAE atu halo verifikasaun.

“Data kandidatura hahú tiha ona iha 17 Janeiru to’o 5 Fevereiru 2017 iha tribunál rekursu no entrega fali dokumentu kandidatura ba STAE atu halo verifikasaun ba lista apoiante no kartaun eleitórál molok halo relatóriu kona-ba rezultadu verifikasaun refere ba tribunál rekursu hodi prosesa” Diretór Jerál STAE dehan

Tuir regulamentu no kódigu konduta ba eleisaun prezidensiál, kandidatu sira sei aprezenta husi númeru mínimu ema 5000 husi sidadaun eleitór iha munisípiu hotu no kada munisípiu tenke iha apoiante mínimu sidadaun eleitór 100 ba kandidatu ida no kada sidadaun eleitór bele fo apoiu ba kandidatu ida.

STAE halo verifikasaun de’it maibe rezultadu verifikasaun, kompeténsia tribunál rekursu mak atu fo sai, ne’e konfidensiál oituan.

Tribunál Rekursu Entrega dokumentu Apoiante kandidatura Prezidente da Repúblika, Amorim Vieira nian ba STAE, Kuarta, (25/01) no kandidatura José Antonio Neves iha Segunda, (23/01).

Entretantu, STAE transporta ona matéria non sensitivu ba munisípiu sira hanesan kadeira 670 no meza 156 hodi fasilita prosesu eleisaun prezidensiál.

STAE mós defini ona totál sentru votasaun hamutuk 693, halo ona rekrutamentu ba totál Brigada 693, totál estasaun votu 941.

Total eleitór iha Australia no Portugal hamutuk 1,171 no totál eleitór rai laran 746,403. Eleisaun prezidensiál sei akontese iha 20 Marsu 2017. (Jornalista : Zezito Silva)

HUSIK IDA HATÁN