Saláriu Funsionáriu MAE Suspende, Ne’e Antesipasaun De’it

0
107

DÍLI, (ANTIL)—Relasiona ho karta ofísiu nú. 24/0241/GDGSC-MAE/I/2017 ho data 19 Janeiru 2017 ne’ebé Ministériu Administrasaun Estatál (MAE) liuhusi husi Diresaun Jerál Korporativu katak fulan ne’e funsionáriu sira husi ministériu ne’e la simu sira nia saláriu, ne’e antesipasaun de’it.

Ba ANTIL, Diretór Jerál ba Servisu Koorporativu MAE, Edgar Siqueira Martins iha nia kna’ar fatin, MAE, Caicoli, Díli, Kuarta (25/01/2017) informa katak iha 2016, saláriu ne’e alokadu iha diresaun idaidak, iha 2017 ministériu nia polítika orsamentu ne’e, sentraliza iha diresaun finansa no depois mak halo atendementu, pagamentu funsionáriu sira.

Tanba ne’e mak ita halo ajustamentu iha ministériu ho Ministériu Finansa (MF) nia kode lock saláriu ninian.“Tanba ne’e mak ministériu Administrasaun Estatál, Diresaun Jerál ba Servisu Koorporativu hasai karta atu informa ba diresaun sira ho antesidénsia, atu antesipa de’it karik iha ajustamentu, ita hahú tinan foun ne’e, keta funsionáriu sira balun iha nia saláriu tama tarde karik, sira bele informadu ona no sira la lakon sira-nia saláriu no ne’e sei selu iha fulan tuir mai,” esplika Diretór Jerál ba Servisu Koorporativu, Edgar Siqueira.

Nia reforsa, agora ne’e, ita seidauk to’o iha fulan nia rohan, seidauk to’o 30 Janeiru. Agora sira rekursu umanu, halo hela ajustamentu sira ne’e no bele akontese no to’o iha fin-do-més ne’e sira (funsionáriu MAE) hothotu bele hetan, simu sira-nia saláriu.

Ofísiu
Ofísiu

Kona-ba karta ofisiu ne’e, Diretór Edgar Siqueira informa, ofisiu ne’e internál Ministériu Administrasaun Estatál (MAE) ninian maibé iha ema balun ne’ebé mak la iha responsabilidade, sira públika fali, posting fali karta ne’e iha Facebook (FB)  nomós tau tan Ministra Finansa nia fotográfia, iha ne’ebé hetan provoka komentáriu barak husi públiku.

Ho nune’e nia akresenta katak parte MAE ninian, sira arepende ba akontesimentu ne’e, nune’e, ministériu sei foti medidas, sei halo investigasaun hodi identifika sese mak responsabiliza ba posting karta ne’e iha FB.“Ita sei foti medidas, sei halo prosesu ba ema ne’ebé mak la iha responsabilidade ne’e,” nia salienta.

Razaun sei toma medidas ba ema ne’ebé posting iha FB ne’e, tuir nia, tanba primeiru nia públika ona dokumentu konfidensiál iha ministériu ninian. Segundu, provoka tan ema halo komentáriu la di’ak ba ita-nia superiór, ba membru governu sira. “Ida ne’e mak MAE sei foti medidas, sei halo investigasaun ba ema ne’ebé mak halo posting karta ne’e iha FB,” tenik tan diretór ne’e

Relasiona ho kazu ne’ebé akontesidu ona ne’e, nia apela katak nu’udar funsionáriu públiku, informadu ona, hothotu hatene ona nia dever, atu bainhira ita sai funsionáriu, atu asegura konfidensialidade iha ita-nia servisu fatin inklui mós karta sira ne’ebé mak konfidensiál.

“Ne’ebé agora ho akontesimentu ne’e hatudu katak funsionáriu sira balun seidauk hatene didi’ak sira-nia dever,” akresenta diretór ne’e. “Husi ministériu fó hanoin dala ida tan ba funsionáriu sira, dala ida tan, ita hothotu atu iha obrigasaun, atu manten konfidensialidade iha servisu fatin,” nia hatutan.

Reforsa mós katak ba funsionáriu sira hothotu, ita sei informa fali atu labele akontese tan buat sira hanesan ne’e. Maibé, ba ema ne’ebé responsabiliza ba aktu ida ne’e, sei loke prosesu. Se identifikadu autór públika karta ofisiu konfidénsiál ne’e, nia realsa katak nu’udar funsionáriu públiku iha lei funsaun públika mak regula, se bainhira identifika ona autór ne’e ita sei aprezenta ba Comissão da Função Pública (CFP) hodi halo prosesu indisiplinár bazea ba lei funsaun públika.

Nia esplika, ofisiu ne’e iha interior MAE ninian, la’ós ba MF ka seluk nian. Ida ne’e MAE ninian tanba iha 2016, keta saláriu balun atraza, problema tékniku ruma liga ho sistema, ema balun protesta.

Agora iha tinan foun, ita mós halo hela servisu hanesan ne’e, ho antesidénsia ba iha diresaun, atu halo funsionáriu sira karik, ema ida rua, saláriu ne’e tama atrazu ba konta, sira bele informadu ona. Agora halo hela esforsu para to’o iha fin-do-mês, saláriu sira bele sai ona.

Karta antesipasaun ba MAE ninian, la reprezenta ministériu seluk, ne’e puramente MAE ninian. Kona-ba justifikasaun saláriu tarde bele mós asesu iha link ne’e:

http://antil.tl/vise-mf-justifika-salariu-tarde-ba-funsionariu/

Jornalista: Rafy Belo / Editor: Gantry Meilana

HUSIK IDA HATÁN