PR Taur Sei Promulga Lei Kriminaliza Rama Ambon

0
55

DILI (ANTIL)—Prezidenti Repúblika (PR), Taur Matan Ruak sei promulga proposta Lei Kriminalizasaun Rama Ambon ne´ebé la kle´ur tan Parlamentu Nasionál sei haruka ba Prezidenti Repúblika atu promulga.

“Preokupasaun ne´e la´ós komunidade sira nian de´it, maibé preokupasaun ida ne´e Prezidenti, Primeiru Ministru, Parlamentu no ita hotu nian mós. Tan ne´e, ha´u sei promulga lei ida ne´e,” Taur dehan ba komunidade sira iha Suku Fatuhada, Postu Administrativu  Don Aleixo, Munisípiu Dili, Kinta (26/1), relasiona ho komunidade sira preokupa kona-ba atividade uzu rama ambon ne´ebé ameasa komunidade sira nia sirkulasaun.

Nia haktuir dadauk ne´e Governu halo tiha ona Lei Kriminalizasaun Rama Ambon no lei refere iha Parlamentu Nasionál ona. Taur tenik ema sira ne´ebé lori rama ambon no katana ne´e krimi.

“Iha ne´e ba oin, ita hotu tenki reforsa seguransa maka´as liu-tan. Ha´u kontenti tanba iha Timor laran iha evolusaun di´ak loos. Maibé, iha mós kazu hanesan iha Dili barak ne´ebé uza rama ambon. Ne´e ita nia sidadaun sira preokupa. Tanba ne´e maka presiza buka fórmas hasa´e kapasidade membru PNTL sira nian para evita buat sira ne´e akontese tan iha aban bainrua,” nia afirma.

Nia agradese ba joven sira tanba bele kontribui ba estabilidade nasionál. Tanba, tuir nia, buat ne´ebé grave ba Timor maka asidenti tránzitu. Kada tinan, Taur tenik, asidenti hakanek no hamate ema to´o rihun.

“Maibé la signifika katak sira ne´ebé kaer rama ambon ita husik de´it sira. Ita sei la fó perdaun ba sira kuandu sira kontinua utiliza rama ambon. Ita hotu hakarak hakmatek no ita hakarak ita nia oan sira la´o ba la´o mai ho avontade. (Jornalista: Xisto Freitas)

HUSIK IDA HATÁN