Lugu Deklara An Nia Kandidatura PR

0
22

Dili, (ANTIL) – Eis Ministru Negosiu Estranjeiru Timor-Leste, José Luis Guterres “Lugu”, atuál Deputadu Parlamentu Nasionál hosi Bankada Frenti-Mudansa deklara ona nia kandidatura Prezidente Repúblika ba eleisaun tinan ne’e.

Kandidatura Lugu nian resposta ona pergunta sira públiku ne’e husu ba eis lider FRETILIN ne’e mos atu avansa iha eleisaun prezidensiál ne’ebé sei hala’o iha 20 Marsu. No iha nia kandidatura ne’e, nia sei avansa nudar kandidatura independente tanba hakarak fo oportunidade ba ema ne’ebé mak laiha partidu no ba ema ne’ebé iha partidu karik atu bele fo konfortavél atu sira bele vota ba kandidatura ne’e.

“Ha’u agradese ba ema hotu tanba wainhira sira hetan ha’u iha estrada, husu ha’u, wainhira mak maun kandata an? nusa mak maun labele ba oin?, entaun loron ohin ha’u hatan ona pergunta hosi publiku nian,” dehan Lugu ba jornalista sira, Kuarta (25/01/2017).

Lugu ne’ebé uluk lakon kompete iha eleisaun antes, esklarese katak, nia laiha ambisaun ruma hodi kandidata an ba Prezidente Repúblika. Maibé nia rasik hakarak haburas demokrasia iha Timor-Leste liu hosi festa demokrasia povu rai ne’e nian hodi hili nia Xefi Estadu foun.

“Ha’u sei ajuda povu ba moris di’ak, liu hosi komitmentu boot atu luta hodi defende soberania Timor, apoia governu hodi halo negosiasaun tasi Timor no servisu hamutuk ho komunidade internasionál hodi fo tulun di’ak ba ita, forsa seguransa no joven sira atu bele garante estabilidade rai,” nia dehan.

Ho kandidatura independente, hakarak hatudu ba povu tomak atu fo sinál ba povu wainhira hili karik, ema ne’e bele dezempeña funsaun sira ba prezidente atu defende povu tomak nia interese ba moris di’ak, liberdade no demokrasia iha rai laran.

Ofisialmente, Lugu sei hamutuk ho nia ekipa susesu hodi lansa nia kandidatura offisialmente iha tempu besik hodi hato’o nia programa saida los mak hakarak kontribui ba iha debate prezindensiál 2017.

Jornalista: Zezito Silva / Editor: Gantry Meilana

HUSIK IDA HATÁN