Lei Pensaun Vitalísia Halo PR Taur Hamriik iha Zona Kloot

0
74

DILI (ANTIL)—Prezidenti Repúblika (PR), Taur Matan Ruak rekuñese katak Lei Pensaun Vitalísia ne´e halo nia hakat ba oin sidi no ba kotuk mós sidi.

“Lei ida ne´e halo detál maneira ne´ebé halo ha´iu ba oin sidi no ba kotuk mós sidi. Ne´e ita iha kloot laran hotu,” Taur hato´o kestaun ne´e hodi responde preokupasaun  hosi komunidade sira iha Suku Fatuhada ne´ebé husu PR  nia pozisaun ba Alterasaun Lei Pensaun Vitalísia.

Nia dehan ninia pozisaun polítika hanesan iha tinan kotuk iha Parlamentu Nasionál no iha fatin seluk katak nia kontra Lei Pensaun Vitalísia tanba ema balun ne´ebé la halo buat ida maibé manán liu fali gerileiru sira.

“Ha´u nia soldadu sira ne´ebé uluk hamutuk ho ha´u iha ailaran kuandu hasoru ha´u ne´e tanis de´it. Imi hanoin took ba. Maibé, ne´e prosesu ida ne´ebé dezafia ita hotu nia kapasidade no vontade,” Taur informa iha nia diálogu ho komunidade Suku Fatuhada, Postu Administrativu Don Aleixo, Munisípiu Dili, Kinta (26/1).

Eis Komandante Gerileiru hateten, oras ne´e, Proposta Aleterasaun Lei Pensaun Vitalílisa iha nia gabinete ona no tékniku sira sei estuda.  “Maibé tuir Konstituisaun, ita boot sira hatene katak uluk ha´u veta orsamentu jerál estadu 2016. Primeiru, ha´u haruka ba Tribunál, depois Tribunál haruka fila fali mai no ha´u haruka fali ba Parlamentu, maibé Parlamentu nein muda vírgula ida haruka fila fali de´it mai ha´u no ha´u laiha dalan seluk atu rekuza sé lae promulga. Karik ha´u la promulga, sira bele lori ha´u ba iha Tribunál no destitui ha´u,” Taur haktuir.

Iha semana hirak liu-ba, Parlamentu Nasionál altera ona lei refere ho votus afavór 45, kontra lima (5) no abstensaun lima (5). Kontiudu hosi alterasaun maka hanesan hatún %60 ba membru Parlamentu no Governu ne’ebé ejérse nia funsaun durante tinan lima (5), mandatu tinan 10 hetan %75 no mandatu tinan 15  hetan %90 hosi saláriu báziku. Ba eis titulár sira, Prezidenti Repúblika mantein ho %100, Primeiru Ministru, Prezidenti Parlamentu Nasionál no Prezidenti Tribunál Rekursu hatún ba %90. Aleinde hatún pursentu ba pensaun vitalísia, iha alterasaun lei ne’e mós halakon regalia balun.

Alterasaun Lei Pensaun Vitalísia hosi PN, bele asesu mós iha link ne´e: http://antil.tl/pensaun-vitalisia-alteradu/

(Jornalista: Xisto Freitas)

HUSIK IDA HATÁN