La’o Hamutuk Konsidera Governu Fraku Halo Planu

0
120

DILI, (ANTIL) – Proposta Orsamentu Jerál Estadu (OJE) 2017 ne’ebé governu aloka ho montante tokon $77 inklui tokon $14 ba projetu Suplay Base, tokon $15 ba Aero Portu Suai no tokon $35 ba auto-estrada, nu’udar frakeza governu hodi halo planu. 

“Frakeza governu nian mak planu, ita haree iha projetu sira hanesan tasi mane ne’e planu fraku tebes”, peskizadór Organizasaun Naun Govermentais, La’o Hamutuk, Juvinal Dias ba ANTIL iha nia servisu fatin Faról, Sesta, (18/11).

Aleinde planu orsamentál, planu seluk tuir nia mak planu reseita no ekonómiku. Ho nune’e, La’o Hamutuk husu atu projetu boot sira tenke avalia hodi ajuda governu halo poupansa orsamentál hodi aloka ba buat ne’ebé nu’udar nesesidade prioridade, maibé labele gasta osan barak.

Tuir nia, projetu suplay base kuandu gasta osan barak maibé kontratu laiha vistu hosi tribunál kompaña, Hyundai sai ona hosi kontratu no laiha ona kampu minarai iha Tasi Timor, tanbasa mak projetu ne’e kontinua, tenke avalia.

“Bayu Undan atu maran tan, Kitan laiha tiha ona, ita la-presiza tau tan osan ba projetu suplay base,” Juvinal Dias fó hanoin.

Nune’e mós kona ba projetu ZEESM (Zona Espesiais Ekonomia Sosiál Merkadu), Juvinal kestiona, se governu tau osan barak saida mak sei bele hetan hosi ZEESM iha futuru, merkadu iha ne’ebé no fornese saida, presiza halo avaliasaun tanba seidauk hatene se Indonezia mós harii tiha ospitál di’ak ida iha Atapupu ou Alor, bele ka la’e Indonézia sira mai iha ospitál Oe-Cusse.

“Ita tenke halo avaliasaun, ita labele halo buat hotu ho mehi de’it,” Juvinal akresenta.

Avaliasaun importante hodi haree posibilidade kontinuasaun ba projetu ne’e ka la’e. Kuandu la’e, hapara hodi investe fila fali ba setór edukasaun, saúde no agrikultura. Tanba sistema edukasaun ohin loron fraku tebes ho nune’e estadu iha obrigasaun atu tau matan, nune’e mós saúde ho agrikultura.

Entertantu iha proposta OJE 2017 ne’ebé governu propoin ona ba Parlamentu Nasionál hamutuk tokon $1.387 fahe ba infra-strutura fiziku tokon $549 kuaze pursentu 40 ne’ebé aloka ba eletrisidade tokon $77, estrada no ponte tokon 206 plus Oé-cusse, Portu, Aeroportu tokon $40 hosi 40 ne’e tokon $33 ba iha Oé-cusse, bee no saniamentu tokon $54, AND tokon $19, tokon 77 ba infra-strutura no planu seluk tan.

Orsamentu ba governasaun nian iha tokon $244, pursentu 18 aloka ba ezekutivu tokon $38, lejislativu tokon $42, judisiál tokon $35 no administrasaun tokon $128.

Orsamentu ba servisu públiku hamutuk tokon $202, pursentu 15, aloka ba edukasaun tokon $128, saúde tokon $73. Orsamentu ba subsidiu hamutuk tokon $208, pursentu 15, aloka ba veteranu tokon $105, joven tokon $11, sosiedade sívil tokon $11, seguransa sosiál tokon $55 no protesaun sosiál seluk tokon $27.

Orsamentu ba Dezenvolvimentu governu tau osan hamutuk tokon $89, pursentu 6, aloka ba ekonmia tokon $55, agrikultura tokon $22, ZEESM tokon $12 (tokon $160 tan ba ZEESM aloka ba setor seluk inklui tokon $75 ba infraestruktur)

Orsamentu seguransa iha tokon $78, pursentu 6, fahe ba F-FDTL tokon $27, PNTL tokon $47 no seguransa seluk tokon $4. Nune’e orsamentu sel-seluk iha tokon $17, pursentu 1 hodi aloka ba kontinjénsia tokon $12 no seluk tan tokon $6. (jornalista: Manuel Pinto; editora: Rita Almeida)

HUSIK IDA HATÁN