KRL Halo Sesaun Diagnóstiku Sistema Justisa Iha TL

0
88

DILI, (ANTIL) – Komisaun  Reforma Lejislativa (KRL) iha setór justisa hala’o meza redonda hodi halo sesaun traballu ba estudu diagnóstiku kona-ba sistema justisa iha Timor-Leste no sistema rezolusaun konflitu nian atu aprofunda justisa formál.

“Estudu ida atu permite sistema justisa formál oras ne’e daudaun halo iha Timór ne’e mak oinsá, saida mak iha ona no laiha, saida mak ita-nia difikuldade”, Komisária KRL, Melisa Silva Caldas ba ANTIL iha Timor Plaza, Kinta (17/11).

Liuhusi estudu no levantamentu ida ne’e, depois rekomenda ba governu no saida mak governu tenke halo iha nivel lejislasaun kona-ba lei ne’ebé atu hadi’a ka hasai, ka halo lejislasaun foun no medida ne’ebé prátiku liu atu aumenta tan rekursu umanu no aumenta oinsá, previzaun ba ema na’in hira nomós tenke halo formasaun.

Deputada Komisaun A, Parlamentu Nasionál (PN), Carmelita Moniz hatete, diagnóstiku ne’e KRL hamosu tanba polítika ida ne’ebé PN no governu foti bazeia ba implementasaun lei, lejislasaun sira ne’ebé aprova, liuliu atu fornese justisa ne’ebé justu ba povu no dezenvolvimentu husi área judisiária.

“Ita atu haree diagnóstiku ida ba sistema justisa tomak komesa husi reforma lejislasaun nomós halo karik reforma ba setór justisa balun ne’ebé ita haree husi ita-nia pontudevista katak ladún favorese ba povu nia direitu”, Carmelita salienta.

Envolve diagnóstiku ida ne’e ba setór justisa sei halo estudu ida husi Judicial System Monitoring Programme (JSMP) no Univesidade Lisboa ne’ebé ema sira péritu mai tulun hodi halo diagnóstiku ne’ebé konsidera nu’udar diagnóstiku nasionál ba setór justisa.

“Ha’u iha esperansa boot ba sira komisaun ida ne’e servisu hamutuk ho peritu sira bele fornese rezultadu diagnóstiku ida ne’ebé di’ak tebes hodi tulun estadu ida ne’e hodi buka solusaun ba ita-nia sistema justisa iha ita-nia rain tomak”, deputada espera. (jornalista: Maria Auxiliadora; editora: Rita Almeida)

HUSIK IDA HATÁN