KAT Ajuda Parte Disputa Halo Mediasaun

0
42

DÍLI (ANTIL) – Ministru “Interinu” Estadu Koordenador Asuntu Ekonómiku (MEKAE) Deonísio Babo dehan la’os Tribunal mak ladun fó importansia ba konselhu Arbitrajen Trabalhu (KAT) maibé natureza arbitrajen ne’e rasik wainhira parte disputa sira la-konkorda.

“Iha âmbitu ne’e, hau atu klarifika ituan katak laos Tribunal mak ladun fó importansia ba KAT ne’ebé estabelese iha tinan hirak liu-ba maibé natureza arbitrajen ne’e rasik wainhira parte disputa sira la-konkorda”, tenik Deonísio Babo iha Seremónia Tomada Posse ba Membrus KNT no KAT iha Sala-K’nua Buka Hatene SEPFOPE Kaikoli, Kinta (26/01).

Liafuan hirak ne’e atu hatan ba diskursu Prezidente KAT Geraldo Moniz ne’ebé dehan, “durante ne’e Tribunal Distrital ladun fó importansia ba pedidu komolokasaun ne’ebé hato’o husi KAT atu bele azekuta komolokasaun ne’ebé Tribunal halo”.

Tuir Deonísio Babo, Natureza arbitrajen hanesan opsional, Tribunal bele halo modelasaun ba desizaun arbitrajen mas ne’e la prevene parte sira iha disputa atu halo rekursu. Tamba ne’e, KAT nia papel atu ajuda parte sira iha disputa, rezolve sira nia problema tamba karakter disputa ne’ebé akontese iha relasaun industial barak liu ho karakter sívil.

“Kuandu karakter sívil, gasta osan barak, lakon tempu barak, dalaruma susar hetan desizaun, Tamba ne’e Estadu harii KAT atu bele ajuda parte sira ne’e halo mediasaun”, nia afirma.

Nia mensiona, Iha timor-Leste ladun sente tamba emprezas bot sira sidauk barak, interesse trabalhador sira sidauk a’as tebes tamba ne’e mak buat hotu ema halai ba tribunal.

Nune’e aktual Ministru Estadu Koordenador Asuntu Administrasaun Estadu no Justisa no Ministru Administrasaun Estatal ne’e dehan tan, Iha nasaun ne’ebé industria la’o makas tebes, negósiu ne’ebé osan bot, ema sei-la ba Tribunal, tamba ba Tribunal bele lakon, atraju trabalhu, prosesu kleur, gasta osan barak atu selu advogadu, no selu kustu iha Tribunal.

Deonísio Babo realsa, Iha Timor-Leste agora dadauk karun tebes, tenke selu 10 % husi kustu ne’ebé mak husu atu Tribunal deside. Porizemplu US$ 1 millaun, tenke selu Tribunal US$ 100.000.

Nia hatutan, iha rai bot hansane hotu, tamba ne’e KAT importante tebes no abang bainrua sekuandu ita dezenvolve Tribunal Arbitrajen diak liu tan atu bele rezolve kazu sira ne’e ida-idak.

“Espera katak tinan hirak mai KAT sei lao diak tamba ema hotu ne’ebé involve iha iha negósiu, lakoi lori ba Tribunal atu halo disputa mas gosta liu lori ba iha KAT tamba fasil, baratu no prosesu lalais liu”, dehan nia tan.

Ministru Interinu MEKAE ne’e adisiona, SEPFOPE halo servisu ne’ebé diak tebes ho Direktór Jeral sira hotu, fó apóiu maluk emprezáriu sira atu ita komesa tama iha faze foun ida iha relasaun industrial iha ita nia rai, bele dezenvolve liu-tan ita nia servisu, tantu setor publiku, setor privadu ho seluk tan. (Jornalista: Julia Chatarina)

HUSIK IDA HATÁN