Inísiu husi ektare neen, Foos Costa Sul tama ona iha merkadu nasionál

0
148

DILI (ANTIL)-Inísiu husi natar ektare neen, ohin loron produtu lokál “Foos Costa Sul” tama ona iha intervensaun merkadu ho pakote saku kilógrama 10”. Produsaun foos ne’e husi kompañia South Rice Production, Lda ne’ebé iha tinan ida ba kotuk (2015) hahú investe iha atividade agrikultura nian.

Na’in ba komapñia mak, Lúcia Lobato, nu’udar eis Ministra Justisa iha governasaun Aliansa Maioria Parlamentár (AMP) nian tempu ne’e, fila an ba vida agrikultór hamutuk ho nia kaben hodi hala’o atividade hanesan ema agrikultór ne’ebé hahú iha rai Natarbora.

“Tinan ida ba kotuk hahú serbisu nu’udar ema agrikultór. Hafoin fulan neen komesa hanoin ho kle’an saida mak atu halo bainhira sai husi prizaun. Sai husi prizaun  iha 2014, hela iha uma fulan neen resin tanba ha’u mós moras no presiza rekopera no hela ho ha’u-nia família tanba ha’u husik sira tinan ida ho balun, apartir ne’e ha’u ho ha’u-nia kaben hanoin ona saida mak tenke halo”.

Nune’e, mosu iha hanoin maski iha maluk barak ne’ebé bolu atu serbisu iha sira-nia gabinete, sai asesora maibé Lúcia Lobato hanoin katak hakarak eskolla serbisu ruma ne’ebé laiha ligasaun ho buat ne’ebé nia halo tiha iha tempu liubá, entaun desizaun ne’ebé iha mak atu halo natar iha rai hela fatin.

“Ami la’o duni bá fatin-fatin hodi buka fatin ida ne’ebé mak iha kondisaun mínimu para atu hahú halo natar depois ami la’o iha fatin barak, ami haree katak husi parte ami-nian ne’e iha fatin rua ka tolu ne’ebé ami bele halo natar antigu ne’ebé paradu tiha lahalo entaun ami hahú halo iha Natarbora no kontinua ba Welaluhu”, Lúcia relata ba ANTIL, Kinta (26/1/2017) iha uma Bidau.

Inísiu halo atividade agrikultura ne’e, halo levantamentu iha terrenu, hasoru komunidade no husu tanba sá tinan naruk abandona natar no tenta difikuldade ne’ebé agrikultór enfrenta depois buka dalan ida atu nune’e kontinua serbisu ne’ebé sira husik hela.

Nune’e, tenta halo akordu simples ho komunidade sira, akordu entre na’in ba rai nian, saida mak atu halo no oinsá halo serbisu no konkorda hotu ona maibé problema boot ne’ebé hasoru mak laiha kapitál atu hahú. “ Ami deside katak ha’u mai Dili atu buka osan. Ita hatene katak, ita iha banku BNCTL, entaun ha’u hakat bá iha ne’ebá, hasoru malu ho sira kala dala haat mas infelizmente to’o tiha fulan-Janeiru 2016 hau hasoru malu tan dala ida maibé presiza hatama tan buat barak entaun buat ne’ebé banku husu imposivel ami atu hatama”.

“Husu dehan garantia, ami tenke hatama surat rai, hau haree hanesan ita labele simu tanba hatene di’ak liu Timór seidauk iha sertifikadu kona-ba rai entaun difisil tebes ami atu hetan, entaun hau fila ho liman mamuk maibé ha’u tenke halo buat ruma”, Lúcia enkoraza an nafatin.

Nune’e, hakat besik bá família ruma ne’ebé halo ona negósiu iha tempu naruk ne’ebé iha osan uitoan, husu sira hodi ajuda orsamentu uitoan para halo buat ruma. Ho apoiu ne’ebé família fó bele halo ona atividade agrikultura ne’ebé ohin loron iha ona rezultadu uitoan.

“Depois tinan ida, ha’u sente kontente tanba iha rezultadu balun ne’ebé sai. Esperiénsia ne’e la’ós atu fó sala ba sé de’it maibé atu hatete katak, tuir loloos iha ita-nia rai iha kondisaun atu hahú prodús rasik no halo serbisu iha ita-nia rai para labele importa beibeik foos, ita bele husik osan ba ita-nia komunidade no fó motivasaun ba ita-nia agrikultór atu kuda hare”, nia hatete.

Ho motivasaun ida ne’e, mezmu laiha koñesimentu ida sobre agrikultura oinsá mak kuda hare, halo natar maibé ho hakarak atu inteira iha vida ida ne’ebé fó moris ba ema hotu, vida agrkultór “konsiente ka lakonsiente agrikultura hanesan fatin ida ne’ebé prodús ai-han atu han, pur tantu ne’e hanesan razaun mai ha’u-nia família atu fila bá halo natar”, Lúcia dehan.

Hahú halo natar ho ektare 6 depois sa’e ba ektare 12. Husi ektare 12 ne’ebé fa’an ne’e hetan osan no daudaun baku ona besik ektare 20 no posivel ektare 30 husi osan ne’ebé hetan, bele hola tan fini ba ektare 30 ne’ebé daudaun ne’e atu halo. Lúcia hatete, ho Naromak nia tulun iha Marsu bele kuda ektare 30. “Ha’u sente hanesan dezafiu ida ne’ebé karik ita hakarak duni serbisu iha dedikasaun, ita bele halo buat ruma. Dalaruma ha’u tuur hanoin, ha’u nunka hatene oinsá mak kuda hare kain ida, fila natar maibé depois tinan ida resin, ha’u bele fa’an foos ida, ha’u bele hatama foos rai ne’ebé ema hakarak atu han. Nu’udar feto ida ne’ebé bele halo, ema seluk mós bele halo ida ne’e”.

Foos Costa Sul ne’e tama ona iha merkadu ne’ebé daudaun ne’e fa’an iha loja balun iha Dili laran iha Lita Store no Lucky Strike Audian. Lúcia relata, husi totalidade ektare ida bele hetan to’o tonelda 5 ka 6 no daudaun fa’an ne’e tonelada foos 4, fa’an hotu ona no iha tempu badak sei fa’an tan foos tonelada 15.

“Semana kotuk hare ne’ebé ami prodús no baku rasik komesa fa’an ona iha merkadu no hetan apoiu husi maluk sira ne’ebé hakarak sosa. Ne’e fó esperansa boot katak foos sira ne’ebé ami prodús ne’e, ami iha osan uitoan para filafali bá kuda tan”.

Liuhusi atividade agrikultura ne’e, kompañia fó ona serbisu ba komunidade sira iha Natrabora no komunidade husi Welaluhu husu atu ajuda sira-nia natar hodi serbisu hamutuk. “Tinan ida ne’e, ami sei kuda iha Welaluhu”.

Kompañia ne’e iha ona funsionáriu permanente na’in-hitu no tenaga lepas ne’e barak depende ba  serbisu. Osan ne’ebé investe ba kuda ne’e, selu ba tenaga harian, joven, ferik, labarik no katuas, natar na’in. Loron ida dolar lima ho haree saláriu mínimu ne’ebé Governu estabelese.

Husi serbisu ne’ebé hahú ho zerro, maibé hetan rezultadu uitoan ona tanba iha ona emprezáriu timoroan ne’ebé hakarak atu apoia atividade ne’e no sosa foos ne’e mínimu saka 700 kada fulan tanba ema ne’ebé serbisu ho emprezáriu timoroan ne’e 700 resin nune’e atu enkoraza empregada sira sosa produtu lokál ne’e.

“Husi ema 700 mak atu sosa produtu ne’e,  maka iha ha’u-nia fuan komesa metin ona ba atividade ne’ebé ha’u halo”, Lúcia katak. (Jornalista : Maria Auxiliadora)

HUSIK IDA HATÁN