Inan-Aman no Igreja Mak Eduka Fuan

0
72

DILI, (ANTIL) – Moderadór Igreja Protestante iha Timor-Leste (IPT), Pastór Lorenço dos Santos, iha nia intervensaun ba sorumutu entre igreja-igreja Protestante iha TL hatete, papél igreja ba dezenvovimentu nasionál mak estabilidade no dezenvolvimentu nasionál ne’e rasik, nune’e mós Igreja no família sai xave hodi eduka ema nia fuan.

“Eduka ema nia fuan atu banati tuir hanesan ema kristaun no fiar katak Kristu sai matadalan atu ema banati tuir, ema halo violénsia no koflitu ba malu tanba falta konsiderasaun liuhusi liafuan, eskola bele eduka ema-nia matenek maibé seidauk bele eduka ema nia fuan”, Pastór hatete iha Novo Turizmu, Sesta (18/11).

Igreja no família sai xave hodi eduka ema nia fuan tanba iha buat tolu kona-ba edukasaun hanesan eduka prinsípiu, prátika no fuan. Prinsípiu ne’e buat ne’ebé di’ak, di’ak ba nafatin no a’at ne’e a’at ba nafatin. Prátika katak tenke tuir ida ne’e no ne’ebá maibé buat ne’e la-la’o, buat hotu iha lei no igreja mós iha regulamentu maibé la-tuir lala’ok sira ne’e.

Nune’e, inan-aman, igreja mak eduka ema nia fuan atubele eduka nia mentalidade atu sai di’ak. “Tanba saida mak mosu konflitu  iha eskola mestre sira hanorin maibé to’o ikus bele baku mestre, igreja mak tenke eduka, inan-aman mak tenke eduka eman-nia fuan, mentalidade no sira seluk”, Lorenço hatete.

Estabilidade mak moris iha unidade no armonia  mak entre igreja ho igreja iha nasaun ida ne’e maski iha suku, relijiaun, rasa la-hanesan maibé tenke unidade no ko’alia kona-ba dezenvolvimentu nasionál mak hatene uluk liu, dezenvolvimentu ne’e halo ba  sé no sé mak halo dezenvolvimentu.

“Afinál ita ema mak halo no  dezenvolvimentu ita mak tenke hetan ninia benefísiu tanba, ne’e mak ita haree katak dezenvovimentu no pás sai hanesan xave atu dezenvolvimentu la’o ho di’ak maibé, dezenvolvimentu labele la’o ho di’ak tanba laiha moris ho unidade no armonia nia laran entaun ita labele hanoin kona-ba dezenvolvimentu”, nia hatutan.

Kompara ho nasaun sira ne’ebé iha konflitu entre relijiaun iha aspetu polítiku sei lahalo dezenvolvimentu iha rai-laran no buat hotu paradu. “Esperiénsia mai ita mós iha situasaun iha Timor-Leste bainhira ita ukun-án iha 2006,  tanba ne’e importante mai ami moris iha armonia nia laran”, nia hatete.

Iha nia intervensaun ikus iha fórum igreja protestante ne’ebé realiza husi Ministériu Estadu Koordenadór ba Asuntu Sosiál, igreja protestante iha Timor-Leste sai parseiru ba governu no estadu atu sevisu hamutuk ho kontribuisaun atu hadi’a Timor-Leste ba oin, tanba ne’e estadu mós iha konsiderasaun hodi tau matan ba igreja no kooperasaun di’ak tuir lei haruka. (jornalista: Maria Auxiliadora; editora: Rita Almeida)

HUSIK IDA HATÁN