Governu hakarak sériu investe iha agrikultura tenke muda mekanizmu

0
131

DILI (ANTIL)- Na’in ba kompañia South Rice Production, Lda, Lúcia Lobato hatete, bainhira Governu sériu investe iha agrikultura no sériu atu ajuda agrikultór sira hola produtu lokál tenke muda mekanizmu ida ne’ebé aplika dezde uluk to’o agora.

Governu ho seriedade atu dudu dezenvolvimentu setór agrikultura tenke muda mekanizmu hanesan fahe tratór larezolve buat ida, fahe fini mós larezolve buat ida enkuantu bele kuda maibé lahatene bele prodús ka la’e.

“Sosa hare mós larezolve buat ida, tanba sá mak ha’u hatete hanesan? Tanba ha’u aprende tinan ida tiha ona serbisu natar. Ita atu halo natar to’o hetan foos, serbisu ne’e tenke hahú ita atu baku rai ne’e, hamoos du’ut, hatama bee, baku natar depois halo viveiru depois iha prosesu naruk ida to’o ita hetan foos ida han ne’e no ita-nia komunidade atu halo hanesan ne’e seidauk”, Lúcia dehan ba ANTIL, Kinta (26/1/2017) iha Bidau.

Lúcia hatete, iha terrenu dehan iha estensionista maibé durante ne’e laharee estensionista, iha tratór barak maibé aat hotu laiha manutensaun. “Sira kontinua simu osan fulan-fulan, osan hira mak sai ona ba ema sira ne’e”.

Enkuantu Governu sosa hare, osan ida ba investe sosa haree ne’e lakon tiha ona  tanba hare ne’ebé dulas atu hetan foos ne’e hetan fali osan ka la’e, pur tantu síkulu ida ne’e lafó garantia osan ne’ebé investe ba hola hare ne’e.

“Osan ne’ebé Governu investe ba sosa hare ne’e, labele lakon, fó duni ba komunidade tanba sosa sira-nia hare maibé hare ne’e tenke prodús fali osan ne’ebé hasai ba sosa ne’e. Se la’e hanesan ita lori osan ba so’e de’it”, nia katak.

Nia aumenta, hahú husi governasaun dahuluk to’o agora hatete katak agrikultura ne’e prioridade boot atu prodús ai-han maibé tarjetu atu hapara importasaun husi rai-liur ne’e bainhira.

Nia kontinua, importa nafatin foos tanba ne’e resposanbilidade Governu nia atu asegura ai-han tanba produsaun rai-laran menus maibé oinsá mak Governu nia tarjetu atu hamenus importasaun no hasa’e produsaun rai-laran ne’e mak importante.

Tinan ne’e, Ministériu Komérsiu Indústria no Ambiente sei foku ba produtu lokál hare ho tonelada 2.275 ho montante orsamentu USD $992. (Jornalista : Maria Auxiliadora)

HUSIK IDA HATÁN