Fó Tempu ba Jerasaun Foun, Horta Desidi la Kandidata án

0
70

DILI (ANTIL)— Premiadu Nobel ba Páz, Dr. José Ramos Horta deklara la kandidata án ba pezidenti repúblika (PR) periodu 2017-2022 tanba hakarak fó oportunidade ba jerasaun foun sira atu asumi kargu importante ida ne´e.

“Ami hanesan jerasaun 74-75 labele konta ona ami ba iha eleisaun. Tanba ne´e, ami hakarak serbisu hamutuk ho jerasaun foun para hametin estadu ne´e no hadi´a ita nia ekonomia,” Horta dehan kestaun ne´e ba jornalista sira liuhusi konferénsia ba imprensa ne´ebé hala´o iha nia rezidénsia, Metiaut, Dili, Kinta (26/01/2017).

Nia informa, maske la kandidata án maibé kontinua serbisu ba Timor nia di´ak. Bainhira eleisaun lejizlativu ramata, Horta dehan, nia sei haree posubilidade hotu-hotu para kontribui ba dezenvolvimentu Timor hosi parte ne´ebé de´it.

“Kuandu eleisaun lejizlativa hotu, ha´u sei haree oinsá ha´u nia partisipasaun katak partisipa ho partidu ruma ka lae, apoiu partidu ruma ka lae, fila ba governu ka lae ne´e depende sé maka manán?,” eis prezidenti repúblika haklaken.

Nia promete katak nia sei la fó apoiu ba kandidatu prezidenti repúblika sira ne´ebé oras ne´e avansa tanba respeita ba kandidatura hotu-hotu. “Ha´u respeita sira hotu. Tanba ne´e, ha´u sei la hili ida depois abandona ida seluk,” Horta tenik.

Nia haktuir, dala barak nia inkontru ho Eis Primeiru Ministru Xanana Gusmão no Dr. Marí Alkatiri, ko´alia kona-ba tranzisaun jerasaun foun maibé la ko´alia kona-ba husu apoiu atu kandidata nia ba prezidenti repúblika.

“Ami ko´alia kona-ba tranzisaun lideransa. La´ós buka apoiu ha´u ba Prezidenti Repúblika. Nu´udar líder, kita tenki haree saida maka dezafiu boot ba Timor-Leste iha tinan 2017-2022. Dezafiu ne´e bele oi-oin. Dezafiu kiak, saúde no edukasaun. Ita haree tiha dezafiu, ita tenki haree mós prioridades. Kuandu ita hatene ona dezafiu saida, ita bele difini prioridade ne´ebé di´ak liu no importante hodi infrenta dezafiu sira ne´e.

Ramos Horta iha 2007 to’o 2012 eleitu ba Prezidenti Republika halakon kandidatu hosi Partidu FRETILIN, Francisco Guterres “Lu-Olo”, maibe iha eleisaun 2012, wainhira kompete hikas nia labele avansa ba segunda ronde tamba lakon votos hosi Lu-Olo no Taur Matan Ruak, ikus Taur Matan Ruak mak eleitu ba Prezidentu Republika.

Jornalista: Xisto Freitas / Editor: Gantry Meilana

HUSIK IDA HATÁN