Cacusan CF ho SLB Impata 1-1

0
32

DILI (ANTIL)—Cacusan CF impata 1-1 ho AD SLB Laulara iha jogu amigável (try out) ne´ebé hala´o iha Kampu Demokrasia, Bairu Formossa, Dili, Kinta (26/1).

Golu impata ne´e klubu rua realiza iha jogu segunda parte. Iha primeira parte, la atinji golu maske klubu rua hala´o jogu ofensivu. Golu realiza uluk hosi Cacusan liuhusi jogadór Avansadu Rofino Gama (55) no hosi SLB realiza hosi jogadór médiu João Frith (7).

Ekipa AD SLB Laulara
Ekipa AD SLB Laulara

Treinadór Cacusan CF, Clementinho de Carvalho, orgullu ho nia jogadór sira. Tuir nia katak sira nia jogu iha mudansa hosi liña ba liña kompara ho jogu antes ne´ebé sira hala´o ho Académica FC.

“Jogadór sira iha komprende malu ona. Hanesan ohin ne´e defeza mai iha médiu, médiu  mai iha avansadu ne´e di´ak liu ona. Maibé, presiza tan maka tékniku sira liu-liu ba iha pussing, crosing no pozisaun book an sein ho bola (bergerak tanpa bola) ne´e maka presiza treinu tan molok kompete iha jogu Liga Futeból Amadora (LFA),” Clementinho informa.

Nia hateten nia laiha dúvida ona ho kapasidade jogadór sira tanba jogadór foun sira ne´ebé maka tama iha Cacusan ne´e halo kombinasaun di´ak tebes ho jogadór tuan sira iha Cacusan.

Ekipa Cacusan CF
Ekipa Cacusan CF

Entretantu, Treinadór AD SLB Laulara, Mr. Kim konsidera ninia jogadór sira seidauk joga ho másimu. Nia esplika, frakeza ne´ebé sira infrenta maka jogadór sira ladun halo pressing entaun la hetan oportunidade atu hatama golu barak. Tanba ne´e, nia sei motiva no treinu jogadór ho di´ak liu-tan nune´e bele joga ho efetivu. (Jornalista: Xisto Freitas)

HUSIK IDA HATÁN