Benvinda Promove no sei Reprezenta Timor Kanta iha “Conexão Lusófona”

0
183

DÍLI, (ANTIL)—Foin lalais, iha Timor-Leste mosu tan figura artista foun ida, Maria Vitória (Marvi) hafoin reprezenta Timor-Leste hodi tuir kompetisaun múzika Dandut nível Ázia. Mezmu la sai vensedór, maibé artista ne’ebé konsidera nu’udar “Perola negra” ne’e konsege konvense povu timoroan tomak nia fuan inklui estranjeiru sira tanba nia lian no humildade.

Maske nune’e, antes ne’e, iha mós timoroan seluk, ho otas kuaze hanesan Marvi, reprezenta mós Timor-Leste hodi tuir konkursu The Voice Kids, Portugal hodi konsege mós hamorin nasaun Timor-Leste nia naran iha Eropa no mundu. Nia mak Benvinda Bakhita Ramiro de Jesus.

Ba ANTIL, Benvinda de Jesus haktuir katak hafoin partisipa iha The Voice Kids, nia fuan monu loloos kedas ba múzika tan antes ne’e maske kanta ona bainhira otas sei ki’ik maibé ho intensaun ba entretenimentu de’it no la iha hanoin halo múzika sai buat ida importante iha nia moris.

 Benvinda nia atuasaun iha 20 Agustu 2015, loron FALINTIL
Benvinda nia atuasaun iha 20 Agustu 2015, loron FALINTIL

Virál, hafoin hananu tiha knanuk ho títulu “Royals”, versaun kantora Lorde (Ella Marija Lani Yelich-O’Conno, artista husi Nova Zelándia), Daniela Mercury nu’udar juri brazileira ida, ho sotake típika brazileira husu nia naran, nia hatan: “Benvinda” ho oin no hamnasa midar, karakteriza timoroan.

Konfuzaun juri ne’e hatan hikas: “seja bem-vinda também”. Katak, Bemvinda mós. Ambiente tribun nakfilak án tiha bainhira juri ne’e persebe katak konkorente ne’e naran Benvinda, naturál husi Timor-Leste. Natoon ne’e, situasaun sai tiha “Trend” ida.

Liutiha tinan rua (2015, 2016), la kle’ur tan, dala ida tan, provavelmente iha Maiu tinan ne’e, Benvinda sei mosu hikas iha palku leten, reprezenta nasaun ne’ebé konsidera nu’udar illa Lafaek ne’e, nu’udar timoroan hodi hananu iha Conexão Lusófona. Asosiasun juvenil no joven sira husi nasun ho dalen portugés, harii iha 2009 husi foinsa’e luzófonu ne’ebé hakarak hakbesik malu liuhusi fahe identidade, kultura no realidade sosiál husi nasaun sira ne’e.

 “Ha’u hakarak mós fó koñese ita-nia rain Timor-Leste ba mundu kona-ba ita-nia kultura, ita-nia povu no aspetu seluk kona-ba ita-nia nasaun,” hateten kantora timoroan, morena, fuuk-been no sempre hamnasa midar ne’e liuhusi Facebook (FB), ohin, Sesta (27/01) ne’e husi Portugal.

Antes ne’e, iha, 18 Setembru 2015, Benvinda mós esplora ona nia talenta muzikál iha Festivál Conexão Lusófona ne’e, lori bandeira no naran Timor-Leste hananu iha Coliseu dos Recreios (Rua das Portas de Santo Antão, 96 – Lisboa) hamutuk ho kantora luzófona sira seluk hanesan Deolinda, Kataleya, Costa Neto, Calema, Filipe Santo, Zukatuga, Don Kikas, Elida Almeida, Binhan Quimor, Marcia Castro inklui banda PLINT-Pablo Lapidusas International trio.

Benvinda nia atuasaun iha programa “Praça de Desembro” 2016
Benvinda nia atuasaun iha programa “Praça de Desembro” 2016

Iha konkursu The Voice Kids, Portugal, fuan domin husi Benedito de Jesus [Lospalos-Ainaro] no Filomena Soares Gerreira do Rego de Jesus (Ainaro-Manatuto) ne’ebé halo batalla hamutuk ho konkorente seluk, Inês Durão ho João Pereira ne’e mós haktuir katak oras ne’e dadaun nia tuir hela eskola múzika, iha Coimbra, Portugal.

“Hafoin ha’u-nia partisipasaun iha  The Voice Kids, iha Portugal, iha 2014, ha’u hahú kedas tuir aula kanta ninian iha Academia de Música de Coimbra. No dadaun ne’e ha’u estuda hela kona-ba múzika, nune’e mós ha’u integra án iha banda múzika “Cabeça de Cartaz” nu’udar vokalista iha akademia múzika ne’e rasik dezde 2015,’’ konta tuir timoroan ne’ebé moris iha Díli, 03 Janeiru 2001.

Lala’ok, Benvinda de Jesus ho zodiak Capricorno ne’e hodi integra án iha mundu muzikál, husi Timor-Leste ba to’o Portugal hodi konsege tuir programa konkursu The Voice Kids.

Nia haktuir katak iha 2009, nia tuir família ba Portugal ho objetivu atu eskola, bainhira ho otas sei ki’ik, ho tinan walu. Entretantu, tinan ida ho balun tiha, bainhira hela iha ne’ebá, Benvinda komesa kanta no ema hahú bolu hodi ba kanta iha atividade ki’ik oan sira liuliu mós ba atividade sira ne’ebé organiza husi Académico Timorenses em Coimbra (ATC), grupu timoroan sira ne’ebé estuda iha Coimbra, Portugal.

“Iha 2014 bainhira ha’u hakat ba tinan 13, ha’u-nia bin daruak (Sandra de Jesus) informa mai ha’u katak iha Portugal ne’e ema hahú loke edisaun dahuluk The Voice Kids ho nune’e ha’u mós tenta ba partisipa. Ha’u entuziasmadu oituan maibé mós sente fuan tukutuku oituan tanba foin dahuluk mak partisipa,” akresenta kantora timoroan ne’e.

Timoroan ne’ebé iha futuru, mehi hakarak sai profesora no atriz ne’e hatutan, ikus mai buat hotu la’o di’ak, entre kandidatu na’in 9000. Husi kandidatu sira ne’e nia konsege hetan pozisaun ba 54, nia sente nu’udar vitória boot ida tan entre ema barak maibé nu’udar únika timoroan ida konsege inklui. Orgullu ida.

 “Hahú husi ne’e kedas, hahú mosu dadaun atividade balun ne’ebé ha’u halo relasiona ho múzika, ha’u sente kontente tebes no onestu katak múzika buat ne’ebé fó tebes vontade mai ha’u atu serbisu to’o fim,” tenik tan Benvinda.

Iha nia movimentu lorloron, Benvinda buka aprende no aprende bebeik, hetok koko dezenvolve án, nune’e dala ida tan foin lalais ne’e media, Radio e Televisão Portugal (RTP) laran monu teni ba nia, hodi bolu ba anima komunidade, belun portugés sira iha programa “Praça de Desembro” 2016, tinan kotuk ne’ebé “host” husi Sónia Araújo e Jorge Gabriel.

 “Nu’udar esperiénsia di’ak ida, nu’udar entrevista dahuluk iha televizaun portugeza. Ha’u konfesa, ha’u ta’uk-ta’uk oituan maibé di’ak nomós klaru nu’udar timoroan ha’u entrega ho laran luak selendang (tais) ba kada aprezentadór sira ne’e,” nia konta tuir.

 Husu kona-ba inspirasaun, Benvinda de Jesus informa katak inspirasaun sira mai husi saida mak nia hala’o iha-nia moris lorloron.“Ha’u-nia esperiénsia pesoál, relasaun ha’u nian ho família no belun sira. Realidade, hatudu mai ha’u ema oioin ne’ebé fó motivasaun no inspirasaun,” nia hatutan.

Nune’e mós, kona-ba jéneru múzika saida mak sai preferidu, Benvinda rekoñese katak to’o ohin loron seidauk eskolla jéneru múzika ne’ebé espesifíku.“Ha’u rona kuaze múzika hothotu maibé liliu mak : Soul, Pop, Pop Indie, Jazz, K-Pop, Rock psicodélico. Kona-ba artista sira, ha’u gosta no identifika barak tebes no ha’u la konsege temi sira-nia naran idaidak maibé balun ne’ebé ha’u hanoin hetan mak hanesan Paloma Faith, Lorde no Sabrina Carpenter nu’udar artista oioin. Maske nune’e, sira ne’e balun sai ha’u nia preferénsia,” haktuir Benvinda de Jesus.

Nia haktuir tan, dadaun ne’e, nia kontinua buka atu aprende buat foun, nune’e bele fila mai kontribui mós nu’udar sidadaun ida ba Timor-Leste liuhusi edukasaun.“Ha’u buka aprende nafatin buat foun, ha’u gosta esperiénsia ida ne’e. Ha’u sei fila ba Timor-Leste hodi bele kontribui ho buat ne’ebé pozitivu tanba dadaun ne’e mós ha’u saudades lós ho ha’u-nia rain,” haktuir tan timoroan ne’ebé gosta mós aprende múzika española ne’e.

Antes ne’e, Benvida mós hananu knanuk timoroan nian ho títulu “Dame” ho kolaborasaun hamutuk Voldemort Band hodi diverte timoroan sira iha komemorasaun loron FALINTIL (Forças Armadas da Libertação Nacional Timor-Leste), iha 20 Agustu 2015 iha Tasi Tolu, Díli, Timor-Leste. Bele asesu iha link ne’e:

https://www.youtube.com/watch?v=IxLEunfjvKE

Nune’e mós, Benvinda nia partisipasaun iha The Voice Kids, Portugal, iha 2014 bele asesu iha ne’e: https://www.youtube.com/watch?v=2zzLICIi0l8

(Jornalista:Rafy Belo)

HUSIK IDA HATÁN